Aizawl District Village Council Association chuan thuchhuah siamin Mizoram sawrkarin ni 100 inhlawhna (MGNREGS) a kalpui dan chu tha tawk lo an tih thu an sawi. Nimina thuchhuah an siamah Aizawl District VC Association chuan mipuiten an hnathawh hlawh an dawn tur a chhuah vek tawh hnuah leh mipuiten an hnathawh tur angte an thawh zawh vek hnu pawha hun rei tak sum hren khawtlai a ni thin chu pawi an tih thu an sawi bawk a ni. Sawrkar laipui atanga mipui inhlawhna tura sum lo kalte chu a dawng tur dik takten an hnathawh zawh rual a an lak nghal zel theih nana hma laksak turin sawrkar an ngen. VC Association chuan June leh July thlaa Darlawn leh Phullen RD Block hnuaia mipui inhlawhna an thawh zawh vek tawh hnua pawisa an la pe thei lo chu mipui an lainat tih sawiin Krismas hma ngeia an dawn theih nan hma laksak turin an ngen tih an sawi bawk.