Aizawl: Kum 2014-2015 chhung khan Mizoram Health Care Scheme (MHCS) atangin damlote inenkawlna senso Rs. 1,23,532,722/- pek chhuah a ni a, heng zinga a chanve deuhthaw, Rs. 60,879,793/- hi Hepatitis C leh Cancer enkawlna senso a ni.

Kum kalta, 2014-2015 chhung khan health department chuan MHCS hnuaiah MR Bill 8,209 dawngin heng zingah 365 hnawl a ni a, bill pawm 7,843 atanga damlo inenkawlna senso an pek let chu Rs. 1,23,532,722 a tling a. RSBY hnuaiah bill 29,039 dawngin 1,513 chu hnawl a ni a, bill pawm 23,359 atangin Rs. 1,24,364,182 chu pekchhuah a ni tawh a, tunah hian bill 3,607 chu buaipui mekin an buaipui zat hi Rs. 20,102,720 a tling.

MHCS bikah hian Hepatitis C-ah Rs. 37,027,363 pek chhuah a ni a, cancer damlo inenkawlna atan Rs. 25,609,621 pek chhuah a ni bawk.

MHCS dilna lut 7,262 (Rs. 89,513,622) hi Mizoram chhunga inenkawlna senso niin a dang, 581 (Rs.34,019,100) hi Mizoram pawna inenkawlna senso a ni.

Thawktute chuan MR bill an dawnte chu ni 21 chhungin an peih fel hman tih an sawi a; mahse, cheque sign-tu leh thil dang tih ngai a awm avangin an duh angin an pe chhuak hma thei lo tih an sawi a. Kum 2014-15 sum pawh hi tun kar chhung khan an peih fel thei chauh a, a chhan ZALEN zawhna chhangin MHCS thawktute chuan, “March, 2015 tawp thlenga damlote inenkawlna hi bill theih a ni a, damlo thenkhat damdawi inah enkawl mekte nghah an ngai a, thenkhat chu May thlaah damdawi in atanga chhuahtir chauh an ni a, heng mite hi nghah an ngaih avangin kan peih har a ni," tiin an sawi.

MHCS chuan finance department-in sum pek chhuah kawngah harsatna an siam lo tih sawiin, "Finance lam chuan rang takin an peih a; mahse, bill nghah kan neih bakah kan department lamah thawktute damlohna avangin duh angin kan peih hma thei lo a ni," an ti bawk.

MHCS-ah hian nikum chhung khan BPL chhungkua 50,020 leh APL chhungkua 16,017 an inziak lut a, kumin 2015-2016 atan enrollment hi tih leh mek a ni a, June, 2015 thleng atan hun hawn niin district atanga a la luh kim loh avangin enrollment ti zat chiah hi hriat theih a la ni lo a ni.

Health care scheme-ah hian category thum awmin Rs. 500-a enrollment titen nuai khat, Rs. 750-in nuai 2 leh Rs. 1000 a enrollment tiin nuai 3 thleng an bill thei a ni.