Aizawl February 25, 2024 : Mizoram State Health Care Scheme hnuaiah February 19, 2024 thleng khan damlo bill bat 13,053 awm mekin bill bat tlingkhawm hi Rs. 45,59,61,743 a ni a. Mizoramin health care atana Asian Development Bank atanga loan vaibelchhe 1,000 lak a tumah June thlaah inremna sign tum a ni.

ZALEN RTI zawhna chhangin health department chuan sawrkar thar a pian hnu (December 4, 2023)-ah January, 2024 khan damlo mi 5,026-te bill pekchhuah tawh a niin pekchhuah zat hi Rs. 14,99,98,817 a tling a. MHCS leh AB-PMJAY te chu thlunzawm tum a niin sawrkar thutlukna nghah mek a ni tih a sawi.

MSHCS hnuaia inziak lut chu tun hnaiah a kum telin an tlahniam tih RTI chhannaah hian tar lan a ni bawk.

Assembly session neih mekah Dampa bialtu MLA Lalrintluanga Sailo zawhna chhangin Health Minister Lalrinpuii chuan sawrkar hmasain health care atana Asian Development Bank atanga loan Rs. vaibelchhe 1,000 a lak turah nikuma state MLA inthlan khan tlemin a tikhaihlak niin a sawi a. Hei bakah hmalak mek a nih laiin kumin India ram pum inthlan neih zawh hnu June thlaa loan sign turin hmachhawp a ni tih a sawi.