Aizawl: Naktuk July ni 6 hi Mizo Hmeichhe Insuihkhawm Pawl (MHIP) dincham vawi 41-na a ni a, ram pumah he ni hi ropui taka hman tum a ni. MHIP General Headquarters hruaitute chu hmun hrang hrangah insemdarhin he ni hi an hmanpui dawn a, MHIP President Lalthlamuani leh Asst.Secretary T.Lalthangpuii te chuan Chhingchhip leh Baktawng Branch-ah he ni hi an hmanpui ang a. Vice President Dr.Thanpuii Lengpuiah, Gen. Secretary Saipuii leh Fin.Secy. Lalngaihawmi te Zote-ah, Treasurer Lalengkimi ITI leh Kanan Branch-ah an hmanpui ang. MHIP President Lalthlamuani chuan MHIP Day pual hian thuchah tihchhuakin kum 2015-2017 a MHIP kumpuan 'Hmeichhia leh naupangte hmasawn na leh himna atan nasa taka tan lak' tihlawhtling tura theihtawp chhuah turin member tin a sawm a, Faina leh thianghlimna kawnga tanla thar tur te, MHIP thuvawn 'Mite tanpui' nasa lehzuala tanla turin a sawm.