ZALEN August 06, 2026 : Mizo Hmeichhe Insuihkhawm Pawl (MHIP) chuan vawiinah khan Aizawl Press Club-ah thuthar thehdarh tute kawmin tun hnaia social media-a hmeichhe thuam hmanga insawisak leh indeuhsawhna thleng chu pawi an tih thu an sawi. 

MHIP chuan Politics ah a ni emaw, eng thilah pawh ni se, kan in sawisa in, kan in deu sawh duh anih pawhin, hmeichhe thawmhnaw hmanga tih a nih chuan, hmeichhia te hi kan dam thei ngai dawn lo a, kan pawm thei lo a ni. Chuvangin, hmeichhe thuam hmanga, insawisak leh indeuna hi thleng tawh lo se an tih thu an sawi.

MHIP chuan Mizo puan pawimawh tak, a bik takin GI Puan-te chu hman dan dik zawm tur a pawimawh thu an sawi bawk a. Puanchei, Tawlhlohpuan, Hmar-am, Ngotekherh leh Pawndumte hi a hmanna tur dik tak leh a hman lohna turte, sorkar hian a ti chhuak a, zawm a hlawh tha lo hle a. 

Hmun tam takah Puanchei hi, ruang khuh nan ten kan la hmang a. Dawhkan khuh nan emaw bang cheimawi nan te kan la hmang thin a, hei hi phalloh a ni. Sorkar in dan ang thlap a, Mizote ta a ni a. Eng programah pawh dawhkan khuh nante, bang cheimawi nan te, kan hmang tur a ni lo. Heihi kan zawm hram hram a pawimawh hle a ni an ti.

Mualthuam North-a kum 15 mi H. Ramdinpuii thihna chungchang pawh sawiin, pawi khawihtu a awm a nih chuan man thuai a, dan hnuaiah na taka hrem turin an duh thu an sawi bawk a. Hmeichhe chunga diklo taka chetna leh tualthihna te chu MHIP chuan enliam lovin, hma an la zel dawn tih an sawi bawk.