Aizawl: Social Welfare Minister PC Lalthanliana chuan nimin khan Mizo Hmeichhe Tangrual pawl kum 70-na lawmna 'Platinum Jubilee' hun MHT Working Women’s Hostel, Khatla-ah a hmanpui a, sawrkarin naupang, fahrah leh chanhai zawkte chawikan zel a tum thu a sawi. PC Lalthanliana chuan Social Welfare Department chuan Children’s Home 24 tanpuina an pek mek thu a sawi a, chung zingah chuan MHT enkawl Motherless Babies’ Home chu a hmang tha ber pawl anni a ti a. Mizoram chhungah chhungkaw kehchhia avanga enkawltu nei lo naupang khawngaihthlak an awm tam lutuk chu pawi a tih thu a sawi rualin,'Kan ramah hian ‘fahrah’ tia sawi tur awm tawh lo hial se duhthusam a ni' a ti. Social Welfare Minister chuan India rampuma hmeichhiate hamthatna tura din 'Universal Women Helpline' chu Social Welfare Depatment kaltlangin Mizoram-ah pawh tan a ni tawh thu sawiin, sawrkar laipui phalnain District tinah ‘One Stop Crisis Centre’ pawh din tum a nih thu bakah hmeichhia tharum thawhna vanga harsatna tawkte a bik taka enkawlna tur damdawiin pawh sak tum a nih thu a sawi bawk. Khualzahawm Vanlalawmpuii Chawngthu MLA chuan sawrkarin duhsak takin Mizo hmeichhiate ram rorelna a atel ve theihnan reservation a pe tih sawiin an hnathawh that leh that lohin hmeichhiate hmalam hun a hril dawn niin a sawi. Mizo Hmeichhe Tangrual hi ni 16.7.1946 khan Mizo High School, Mission veng, Aizawl-ah din tan a ni a; an President hmasa ber chu Lalthanzami w/o K.T.Khuma a ni. MHT Conference hmasa ber chu ni 26-28.1.1948-ah neih a ni a, General Assembly hmasa ber chu ni 12.3.1949 khan hman a ni. Mizo Hmeichhe Tangrual-in an tum ber Mizo hmeichhia leh naupangte dinhmun chawikawn leh tihhmasawn a nih angin an din tirh atanga tun thlengin fahrah leh naupang awmna ‘Motherless Babies’ Home’ bakah Working Women’s Hostel an enkawl mek a ni.