- R.Zomawia Hmasawnna hrang hrang kan rah chhoh mek zinga pawimawh em em mai chu bawlhhlawh paih fimkhur leh vawk vulh, ar vulhna hmun hi a ni. mihring hriselna tluka pawimawh a awm chuang lo va, thil dang zawng zawng aiin kan inveng fimkhur tur a ni ang. Bawlhhlawh awm khawm hian rimchhia a siam a, chu chu a bula awm mihringin a rim a dawn reng chuan hrisel lohnain a tlakbuak mai dawn a ni. Thuneituten mihring hriselna kawngah theihtawpin hma an la ve zel a, mipui lam zawk hi a ngai pawimawh em em tur chu kan ni. Hriselna kawng daltu chu keimahni vek hi a tithianghlim theitu chu kan ni a, sorkar tel lo pawh hian invawng thianghlim thei tur chu kan ni. Aizawl khawpui veng thenkhat, hmun thenkhata hmasawnna tur kan la neih tlem tarlang teh ang. 1. Bawlhhlawh paihah hmasawn zel tum ang: Bawlhhlawh paih motor a lo kal a, a kalna kawngkama mite hriat theih turin thawm a rawn nei a, chu chu hriain bawlhhlawh in tinin an lo dahkhawm chu paih turin an phe dawr dawr thin. Hmuh a nuam ngawt mai. Faina kawnga hmasawnna tha tak a ni ngei mai, mahni in leh a velte vawng fai ila, mahni kawt zawn a ni emaw thenawmte in bul vel pawh nise, bawlhhlawh a awm phawt chuan thianfai zung zung ila, bawlhhlawh paihna lova a remchang changa paih mai mai hmuh tur a la awm nual thin hi inzirtir kan la ngaihna lai tak chu a ni. Kan awmna bul a nih loh avanga tui luankawr remchanga paih mai mai, mi pangngai ang taka lang ve si hmuh tur an awm thin hi a inhmeh lo ngawt mai, hetiang mi changkang awm taka lang, thil eina kawr emaw meizial bawm motor atanga rawn paih chhuak ta mai te hmuh tur an awm thin a, kuhva eina chinai banga tah mai te, thirbana tah var luk mai te hmuh tur a la tam hi kan la changkan tawk lohna chu a ni. Khawlai lunlai a ni emaw vengc hhungah pawh nise, awlsam taka kan paih mai thin a, nula intihmeltha tak leh intichangkang tak ni ve si, hmawmsawm eina kawr bawlhhlawh paihna bawm ni lova remchang an tihna hmuna paih ringawtte hi an zahawm lo hle a ni. Veng thenkhata bawlhhlawh paih fimkhur lo hi kan la awm nual bawk. In bul hnaia luikawra bawlhhlawh paih vum thur mai, ruahsur hun nghaka paih char char hmuh tur a la awm thin hi kan changkan lohna chu a ni. Bawlhhlawh paih hian rimchhia a siam a, tho a titam a, a bula chengte tan boruak tha lo a pe chhuak a, zan mutnaah pawh boruak thianghlim tak dawng tur kha luikawr ruama bawlhhlawh paih avangin boruak thiang tak an hip theih loh phah a, chu chuan mihring hriselna a khawih pawi thei hle a ni. Luikawra bawlhhlawh paih vak vak hian a vela chengte tana a that loh mai bakah ruah rawn surin len bo duak pawh nise, bawlhhlawh a len khan hmun dangah nasa takin harsatna a siam phah thei a ni. Lui tui a tibawlhhlawh thei a, bawlhhlawh a hmun lova paih hi chuan nasa takin mihring tan vek harsatna a siam a, kan buai phah hle thin a nih hi. Chuvangin, bawlhhlawh hi a paihna bawmah paih ila, bawlhhlawh motor-ah paih tum vek ila, khawlaiah bawlhhlawh paih mai mai ching lo ila, a paihna bawm kan hmuh loh chuan ipte-ah ak tha mai ila, a paihna bawm ngeiah kan theihna turin,tichuan,mi changkang tak kan lo ni mai ang. 2. Vawk leh ar vulh: Veng pakhatah ka leng a, ka lenna Inah chuan tukverh an hawn chuan vawk in rimchhia tak mai a rawn thaw lut ham ham mai a, tukverh leh kawngkharpui an khar sawk sawk a, in neitute sawi dan chuan, “Ti hian a khat tawkin thliin a rawn nem fuh phei chuan a rim a chhe lutuk a, kan inhawng ngam ngai lo,” an ti. An kawmchhak maiah vawk an vulh a, vawk in rim chu a chhe hle a ni. Boruak tha tak dawng thei tur kha zanah pawh tukverh an hawn ngamloh chang a tam thu an sawi. Hmun thenkhatah kawngpuiah han kal ila, in bul lawk lawka vawk vulh an lo awm thin a, kawnga kal tan pawh a rimchhe em em a. Vawk vulh lotu zawk in zai an dawh hram hram loh chuan thenawmte intihthiam lohna a thleng awlsam bik a ni. A vulh lotu zawkte an inthalhrung a, mi thenkhat chuan inthlahrung dekin an han hrilh a, vawk lo vulhtute zawk kha a pawr hlei hlei an lo ni zawk mah thin. “Kan duh leh kan ram chhung a nia, in sawi phak a awm lo,” te kan inti mai thin. Inzahtawnna awm miah lo, mi dangin eng angin nge an lo tawrh tih pawh ngaihsak tha duh lo, mahni hmakhua chiah ngaihtuah hi kan la awm thin hi a pawi tak tak a ni. Lehlamah Kristian chhungkua chu kan inti a, kan thatna lamah chuan kan lang fel leh viau lawi a, “He mite chhungkua hi chu an fel tak tak a ni,” ti khawpa lehlama felte hi mahni thenawmte mit timim tlat kan awm thin. Ar vulh pawh hi chenna in bul hnai a nih chuan rin aiin a rim a lo na phian a, thenawmte tan a lo rimchhe duh khawp mai, in inhlat deuhah te chuan a rimchhia hriat phak loh tawk a awm ve thei bawk a, a tlangpui thu chuan in hnai tete kan ni hlawm a, ar vulhna hi a hmun kan fimkhur tawk loh chuan thenawmte tan hnawksak awlsam kan lo ni mai thin a ni. Thenkhatah chuan in chung sangah an vulh a, chu chu thenawmte tan a hnawksak vak lo a ni mai, a rimchhia hriat tur a awm lo deuh thin. Vawk vulh leh ar vulhte pawh Aizawl veng thenkhatah chuan an ti tawh meuh lo, a chhan chu mi dangte tana hnawksak kan ni a, rimchhe siamtu kan nih vang a ni. 3. Mawhphurtuten thianghlimna kawnga hma an lak chak a ngai: Khawpui a lo thianghlim zawk nan a hmasa berah chuan chhungkaw tin kan pawimawh hle a. Thianghlimna kawngah theihtawpin hma la tlang ila, thenawmte tan hnawksak kan lo ni reng thei a, kan inngaih pawimawh tawn a ngai. Pahnihnaah chuan thuneituten rualkhai zawka hma an lak ngam a ngai a ni. Veng tinah bawlhhlawh paihna mumal lo enfiah vat vat sela, a chhehvela bawlhhlawh paihna hmun loa paihten harsatna eng nge an neih tih te, luikawra bawlhhlawh paihte pawh hian harsatna an lo nei ve mial thei bawk a, an awmna atangin kawngpuia bawlhhlawh motor paihna a hla viau pawh a ni thei, chu chu an harsatna te enpui vat ni thei se, local council te an viak a that a ngai thin hle a ni. Bawlhhlawh paih kawngah te, vawk vulh, ar vulhna hmun dik loh avanga thenawmte tana hnawksak siamte zingah luhlul tlat a awm theih a, heng mite hi chu thuneitute inrawlh vat chi a ni. Thenkhat erawh chu han hrilh a, rilru zau tak pu, hotute thuawih tak an awm bawk thin. Rualkhai taka hma la tur chuan khawtlang hruaitute an pawimawh a ni. Veng chhung a lo thianghlim zawk nana hmalaknaah hian khauh takin dan kenkawh ni thei se a tha ngawt ang. Khualzin min rawn tlawhtu an awm ve neuh neuh tawh a, khawpui hulum lai chauh ni lovin khawpui chhunga veng hrang hrang hian faina lamah belhchian an dawl tur a ni. Hriselna kawngah pawh nasa takin hma kan sawn ngei ngei dawn. Fai hi a nuam a, khawpui thianghlim takah kan siam thei, khawpui mawi takah kan siam thei, boruak thianghlim takah kan siam thei, chumi tur chuan kan tanrual a ngai a ni. Bawlhhlawh chu eng atan mah hmanna a awm lo va, mihring chenna bula a kan dah reng chuan hriselna a khawih pawi thei. A hmun taka paih bo vek tur, hetiang chiah hian keimahnia sual bet tlat hi kan paih bo loh chuan kan tan pawn a hnawk a, keimahni pawh kan buai a, mi dang tan kan hnawksak thin a ni. Hmasawnna thianghlim nei turin kan vaiin kan pawimawh vek a ni.