ZALEN December 5, 2025: Indian Oil Corporation chuan Pradhan Mantri Ujjwala Yojana (PMUY) hnuaiah mihring khawsak harsa chhungkua te tan nu ber hmingin Gas Connection a thlawnin an pe leh tan a, tunah hian mi nuai 25 tan dil theihna hun hawn a ni a, December 1, 2025 (Thawhtanni) atang khan dilna hi hawn leh tan a ni.

Pradhan Mantri Ujjwala Yojana (PMUY) hnuaia Gas connection a thlawna dawng thei hi BPL chhungkaw chin an ni a, he scheme hi 2016 atanga tan kha niin vawiin thleng khan mi vaibelchhe 10.33 te pek an ni tawh a, Mizoram-ah pawh he scheme hnuaiah mi 36,921 hnenah a thlawnin connection hi pek a ni tawh tih State Level Coordinator for Mizoram Z. Lhungdim, Deputy General manager (LPG-E), LPG Bottling Plant, Mualkhang ni bawk chuan a sawi.

He connection nei tur tan hi chuan LPG Distributor-ah te, online-in pmuy.gov.in-ah leh Common Service Station-ah te en theih leh zawh fiah theih a ni, he gas connection hi a thlawna nei tur chuan document neih ngai eng emaw zat a awm thung a ni. Connection pek thar tur nuai 24 hi India ram pumin an inchuh tur niin FCS&CA Secretary Teresy Vanlalhruai, MCS chuan a sawi a, DC zawng zawng pawh hriattir an nih tawh thu leh a dawng tur ten an dawn ngei theih nan hmalak a nih thu a sawi bawk.

PMUY hian a tum ber chu chhungkaw khawsak harsaa hmeichhiain thianghlim tak leh him taka rawngbawlna atana siam tuialhthei hmanga rawng bawltir a ni a. Sawrkar hmathlirah chuan hei hian hmeichhe dinhmun chawisan bakah an hriselna tihhmasawn leh in tin atanga LPG hmanga hnawk tih tlem a ni.

Z. Lhungdim chuan Mizorama connection 36,921 zingah hian Mamit chu district zinga free connection pekchhuah tam ber na niin connection 7462 pek chhuah a ni a, Siaha chu nei tlem ber niin connection 1,000 pek an ni. Aizawl - 6618, Saitual - 1265, Champhai - 2187, Serchhip - 1891, Khawzawl - 1051, Lunglei - 4358, Hnahthial - 1825, Kolasib - 5424, Lawngtlai - 3850, Mamit - 7462 leh Siaha 1,000-ah te connection hi pek tawh a ni.