ZALEN, December 25, 2025: Salvation Army-in kumin Red Kettle service an kalpui atanga an sum hmuhchhuah, Rs. nuai 13 chuang chu mi harsate hnenah an sem chhuak.

Kum tina Krismas vuakveta mi harsate puala vehbur an dawh thin, Red Kettle service hi kuminah December 5 atang khan Mizoram hmun hrang hrangah Corps Band-ten rimawi tumin khawlaiah bawm dawhin an tan a, Rs. 13,02,371 an hmu chhuak.

An pawisa hmuh zawng zawng hi Nilaini hian a vaiin mi harsate hnenah an sem hlan a. Cancer Hospital hnenah Rs. 84,576 pein, Aizawl Civil Hospital leh ZMC&H-ah Rs. nuai 1 ve ve an pe a. A bak Rs. 10,09,795 chu veng hrang hrangah local council leh YMA rawn chungin an sem chhuak bawk.

Salvation Army hian khawvel pumah kum 130 chuang kal ta atang khan mi harsate tanpui nan Red Kettle service hi an kalpui tawh a, Mizoramah pawh kum 10 chuang kalpui tawhin Salvation Army rawngbawlna pawimawh leh hriat hlawh ber pawl a ni mek.