ZALEN, December 06, 2025: The Salvation Army-n khawvel pumah kum 134 an lo kalpui tawh, Krismas dawn apianga mi harsa tanpui ngaite tana bawm (Ketli Sen) dawha khawlaia rimawi an tum thin, Red Kettle service chu Mizoramah pawh kuminah an kalpui leh mek.

Kumin atana Red Kettle chu Zirtawpni zan khan India Eastern Territory-a Territorial Commander, Col. Lalbulliana’n Woodland Hills, Aizawlah a hawng a, Inrinni tuk atangin Mizoram hmun hrang hrangah kalpui chhunzawm nghal a ni.

Kumin hian Aizawla Corps Band hrang hrang 27-te chuan Aizawl DC remtihnain veng hrang hrangah Inrinni apiangin Red Ketlle hi an kalpui dawn a, December 20-ah a khaikhawmna a awm ang a, sum lut zawng zawngte chu veng hrang hrangah, khawtlang hruaitu YMA/local council rawn chungin a mamawhtute hnenah an sem dawn ang.

Nikuma Red Kettle service-ah khan Rs. 4,15,255 an hmu chhuak a, kumin hian mipuite zarah nikum aia tam hmuh chhuah leh ngei an tum a, an inbeisei bawk.