October 15, 2023; Lunglei police station chuan tunhnai khan sum hmanga inbumna liantham tak 420 IPC hmangin thubuai an ziaklut a, hemi chungchanga a tisualtu nia puh Michael Chhakchhuak chu man tawh niin, October ni 12, 2023 khan jail ah dah luh a ni.

Lunglei police PRO thuchhuah a tarlan a nih danin, Michael Chhakchhuak hian Aizawl bank lian tak atangin Rs. Nuai 10 mi hming leh document, an phalna la hmasa lova hmang a la nia puh a ni a, thubuai thehluttu Lallawmzuali sawi danin, September 2023 khan loan lak tumin Lunglei bank dangah a kal a, chutah chuan a CIBIL score hniam vangin a loan dilna chu reject sak a nih thu leh a hminga loan tam tham tak a awm thu an lo hrilh a ni.

Loan chu ama hmingin Michael Chhakchhuakin a lo la tih leh, vawikhatmah a lo rul bawk si lo tih hriat chhuah a ni a, chhui chiang lehzualin, V. Laldinpuii, Lunglei, tuna Bihara cheng mek hming pawhin loan hetiang zat chiah hi Michael-a hian a lo la tih hriat a ni.