October 3, 2023 : Kumin kum tir lama misual kut tuar vanga boral ni ngeia hriat H. Chungnunga (91) chu tun thlengin kut thlaktu/thattu hi hriat chhuah la ni lo mahse a document pawimawh te nimin khan Tuipui D Reservoir-ah hmuh niin Police ten a hmunah kalchilhin an enfiah a, hmalakna kalpui chhunzawm zel a ni.

KAILAWN in a tarlan danin, an khawchhunga Tui enkawl tura Tuipui D WATSAN Committee in an rawih J. Malsawma chuan tunhnai khan Reservoir-ah hian Polythene-a thil infun lang chu hmuin lensuah hmanga lak chhuah a tum chu a hawlh pil palh a, mipui a tui sem tur a nih avangin thil tenawm a nih hlauin nimin khan Reservoir a tui awm chu paihin Polythene a thil infun chu a paih chhuak a, hetih laia a bul hnaia lo awm Zosanga chuan lo enchiang-in H. Chungnunga document pawimawh tak tak Adhaar card, Voter ID leh a dangte niin khawtlang hruaitute leh Police te chu hriattir nghal an ni.

H. Chungnunga document an hmuhna hi Bangla tlanga Reservoir 3 zinga a laiah niin Polythene hrang hrang 3 ah infunin chu chu Polythene pakhatah fun lehchhawn niin thudawn a ni

He thu hi Hnahthial Police ten an hriat ve leh SDPO K. Lalnithanga, Case IO Insp. Robert L. Hnamte leh Police thenkhatte chuan Tuipui D hi pan nghalin tih tur tul ang angte an ti a, SDPO chuan zawhna chhangin eng tika vawm luh nge tih hriat loh nimahse ala rei lutuk lo maithei tiin han chhuidawn ngaihna vang viau mahse hmasawnna erawh a pek a beisei thu a sawi bakah a thihna chungchangah hian mi 7 vel chu thu zawhfiah turin an lo lak tawh thu a sawi.

H. Chungnunga hi Tuipui D ah hian mahni a khawsa niin Ni 24.2.2023 zing dar 7:30 vel khan a chenna In ah thichhawng in hmuh a ni a, a tukhumah hliam na tak tuarin hmun 20 chuangah thui a nih bakah a hmai pawh a vungin a duk vek bawk a ni. A hliam tuar lo hian Ni 25.2. 2023 khan Hnahthial Damdawi In ah a boral zui a ni