ZALEN December 7, 2025: April, 2025 atanga hman tan, Mizoram Universal Health Care Scheme (MUHCS)-ah Mizorama mi mal damdawi in tam zawkte tun thlengin an la tel lo a, an dinna ngaiah an la ding.

Non-Government Hospital Association, Mizoram (NGHAM) hruaitute hnen atanga ZALEN thudawn danin, MUHCS zawm leh zawm loh chungchangah Mizorama mi mal damdawi in tam zawkte chu an dinna ngaiah an la ding a, tun dinhmunah chuan zawm leh zawm loh chungchangah thu thar an nei lo.

“MUHCS chungchanga rawtna kan neihte leh kan zawm theihna tur sawrkara kan thehluh chu tun thlengin sawrkar atangin a chhanna kan la dawng lo,” tiin NGHAM hruaitute chuan ZALEN an hrilh.

Mizoram Legislative Assembly Session hnuhnung bera health care chungchang a sawinaah Health Minister Lalrinpuii chuan mi mal damdawi inten MUHCS an la zawm loh chhan ber chu cashless an duh loh vang nia a lan thu a sawi a. An la inbiak reng thu leh cashless an la pawm ngei an beisei thu a sawi.

MUHCS hnuaiah hian AB PM-JAY, Mizoram State Health Care Scheme leh sawrkar MR-te chu chhun fin an ni a, kalphung khat hnuaia kalpui a ni a. Hemi hnuaia hamthatna dawn theih dan erawh siam danglam a ni thung a. Civil pensioner leh provisional employee-te pawh pawh he scheme hnuaiah hian hamthatna siamsak an ni.

MUHCS-te hi sawrkar damdawi inte leh empanelled hospital-te-ah hman theih a ni a, sawrkara inziak lut lo damdawi inah erawh hman theih a ni lo.

Mizoramah MUHCS empanelled private hospital 13 leh empanelled private day care centre pathum a awm bakah Mizoram chhunga sawrkar damdawi in zawng zawngah hman a ni a. Mizoram pawnah empanelled hospital 25 leh deemed empanelled hospital 13 a awm mek bawk.

Mizoram sawrkar chuan MUHCS hmangtu damlote enkawlna senso atan November 28, 2025 thleng khan Rs 84,05,28,095 an pe tawh a, heng hi MUHCS kalpuina damdawi in hrang hranga damlo 54,261 enkawlna bill a ni.