Aizawl; PHED Minister Zodintluanga chuan, "Mi pahnih khat lekin pawisa an lo lak leh zu an lo pek avanga PHE Department pum a mualpho hi kan phal tawh dawn lo, hetiang hi sawi a awm leh a nih chuan order kan chhuaha a tih chingte chu ban nghal an ni tawh ang," a ti. He thu hi nimina PHE Deparment-in tuisem chungchanga infuihtharna Vanapa Hall-a neih a hmanpuinaah Zodintluanga hian a sawi a. PHE hnuaia hnathawktute chu mipui vang chauha awm an nih thu sawiin, "Kan awmna chhan hi mipuite vang a ni a, mipuiin chhiah chi hrang hrang an chhunkhawm atanga an tana rawngbawl kan ni," a ti a. "Keini aia a taka neitu chu sorkar hnathawktute in ni a, kan awm loh hnu ah pawh in la awm dawn," tiin, mipui tan tang lehzual turin a sawm a ni. PHE changtu minister chuan, hnathawktute thawh rimzia mipuiin an hre lo fo thin tih sawiin, tui a awm loh erawh chuan mi zawng zawng demrawn an nih leh thin si a ni, a ti a. Hengte avang hian officer te chu Communication System thar tha tak duangchhuak thuai tura chahin, chumi hmang chuan har-satna a awmte pawh inhrilhhriat zung zung a nih tur thu sawiin, "Mipuite hi kan dah lal tur a ni, anmahni chhiah avanga hnathawh hlawh la kan ni," a ti. Tuisemtu tam ber chu fel, rinawm leh taima taka hnathawktute an nih laiin, pahnih khat avangin an vai hmingchhiat leh mual-phona a thleng thei tih a sawi a. "Thlemna hnawltute hi in zinga zaa 99 vel hi in ni a, zaa pakhat pawh tling lovin pawisa an lo lak leh zu an lo dawn avangin mi tha leh hmingthate kan tichhe vek a ni," a ti a. Complaint an dawnte a dik a nih chuan ban an nih tawh tur thu sawiin, rualkhai thei ang bera tui sem thin turin a chah. Tui meter dik lo a awm thin tih tuisemtute'n an sawi chu officer-ten enfiah nghal turin Minister hian a chah a, mipuite vanga hnathawk mai an ni tih an inhriat reng a tul thu sawiin, tui bill peknaa thawktute pawh hawihhawm taka anmahni dawrtute lo chhawn thin turin a chah bawk. Kalkhawmte atangin thusawi ngaihthlak a ni bawk a, 'interaction' hun neiin tui lama harsatna a awm rualin mipui hrilhriat vat a tul thu te, an hotute'n a bika pek tur ngaihpawimawh an ngah thin tihtlem te an rawt a, overtime-a thawk fo an nih avangin allowances pek te dil nghal a. PHE-a hnathawktu zaa 75 vel chu muster roll an la nih thu an sawi a, 2500 vel an ni a, an regular theih nana sorkarin hma la chak turin an ngen bawk. Rawtna tam berah chuan tuna SIPMIU hnuaia hman mek KRANTi company siam Tui meter chu thlak a tul thu tarlan a ni a. Tuisem tute chuan Pathianni a tuisem chu an huphurh vang ni lovin, a lo dawngtu mipuiten inkhawm te an lo duh thin a vangin a remchang lo hle a, thuneituten ngaihtuah nawn leh se an duh thu an sawi. Tui sem tikhaihlak zawnga VIP an tam lutuk te pawh enfiah turin thuneitute an ngen bakah Officer ten tui semchhuahna hmun pawimawhah vil tam deuh se an duh thu an tarlang. Hnathawktute lamin rawtna hrang hrang an thlente hi Minister chuan officer-te nen an lo enfiah dawn tih a hrilh a ni.