ZALEN September 12, 2025: Excise & Narcotics Department chuan September 11, 2025 (Ningani) zan khan New Champhai, Ramhrangkawn bulah heroin gram 118.300 (Hawng 7) leh a neitu nia puh mi pahnih – T. Hmingthanmawia (36) s/o Biakhnema, Zion Veng, Champhai leh Lalnunpuii (31) d/o C. Rohlira (L), Ruantlang, Champhai nia inchhalte chu an man.

Heroin vanga mante hi The Narcotic Drugs & Psychotropic Substances Act, 1985 tlawhchhanin thubuai siamsak an ni a, 12th September, 2025 khan District & Sessions Court, Champhai District-ah hruai an ni.

September ni 1, 2025 atanga tan, Mizorama ruihhlo lo lut tur beihpui thlakna (Operation Jericho) kal mekah Excise & Narcotics Department chuan Mizorama khawpui hrang hrangah khawlaia ruihhlo ngai leh a zuarte vaikhawmin City patrolling neiin hma an la a. He an hmalaknaah hian YMA, khawtlang hruaitute leh mipuite’n theihtawpa an thawhpuina chuan rah duhawm a chhuah mek a, an chungah Excise & Narcotics Department chuan lawmthu an sawi a ni.