Aizawl February 27, 2023: Vawiin khan ZPM chhung inkhawm neih a ni a; he huna thusawitu Vice President Rev. Dr. K Thanzauva chuan, ZPM chu mi rethei te chhanchhuah tuma thawkchhuak an nih thu a sawi a, society kalphung mi tlem te hamthatna ni thin chu mitin te intluktlanna vantlang nun inthlakah siam tum anih thu leh ramhruaitu atan mihring rilru tha leh mawi neih ngei a ngai tih a sawi.

Rev. Dr. K Thanzauva chuan, “Pathian ram politics chu rethei te lama tan hi a ni. Kan ramah mi tam tak retheihna khurah an lut a, mi tam tak chu hman atangin vawiin thlengin an la rethei reng. ZPM hi mi retheite lamah tangin anmahni kan thawhchhuahpui a, kan chhanchhuah a ngai a ni. Mimalin hmun engemawzatah ram zau tak tak an neih thin tihtawp a tul, Pathianin a phal lo. Hmasawnna hnathawh leh dan hmanga rorelnaa dik a tul a, corruption hi hnawhchhuah a tul. Pathian ram politics tungding turin hmangaihna leh inngaihtlawmna nen mahni inphatin, mualphona leh tuarna kan huam tur a ni. Hemi hmang chauh hian kan ram hi a tho leh thei ang,” a ti.

ZPM Vice President chuan, “Pathian ram politics chu hmathlir tha tak nei a ni tur a ni. Tuna kan society kalphung, mi tlem te hamthatna hi mi tinte intluktlanna vantlang nun inthlak siam kan tum tur a ni. Chutiang tur chuan system dik a tul a, a kengkawhtu leh hmangtu mihring dik a ngai a, fel leh taihmak a ngai a, mi tha kan nih a tul a, ramhruaitu atan mihring rilru tha leh mawi kan nei ngei tur a ni,” a ti bawk. 

Rev Thanzauva chuan, “Beidawnna leh harsatna karah pawh hei leh chen min hruaitu Pathian hian min kalsan lovang. Kohhrana kan tihdik theih hi sawrkarah pawh kan ti thei ang; a system dik se la, mihring dik ila, kan dam tlanna khawtlang kan siam thei ang. System dik nen chuan Mizoram hi sumdawnna hmunpui, zirna hmunpui, sawrkar Council of Minister-te lungrual taka an thawhhona ram, hmasawnna kalphung leh sum hman dan dikna ram, corruption umbona ram kan ni thei. Chu ramah ngei chuan mi rethei te tan khua a var ang a, Zofate hi zahawm takin tual kan la leng ve ngei ang. Kan ram politics-ah harhna a thleng mek a, Pathianin hma a hruai zel a ni,” a ti bawk.