ZALEN September 25, 2024 : Durtlang Branch YMA chuan an member leh rawngbawltute, nungchang mawi leh mite damna atana thahnemngai taka thawktute - Dr. Laldinliana Sailo, Dr. Rinngheta Renthlei leh Lalthlamuana te September 21, 2024 (Inrinni) zana, Durtlang Leitan khur bula an thu hahchawl lai rawng taka sawisak anni hi Durtlang mipuite an rilru a nat thu thuchhuah an siamah an tarlang.

Buaina veng tur zawka ngaih pawikhawihtu zinga tel, City Police-a tanglai Sailianpuia Sailo leh heng an sawisak kut tuarte tawngkam mawi lo taka vau/ sawithaihtu Police Constable Lalruatdika te hi Police hna zahawm tak thawk zel tläkah an ngai lo thu an tarlang bawk.

Heng pawi sawi lo kutthlaktu mi paruk - Police in an man te:

i) Lalmalsawma Zote (25)

ii) Mark Zairemmawia (24)

iii) Lalvenpuia (22)

iv) Sailianpuia Sailo (28)

v) Vanlalpekhlua (23)

vi) K Vanlaitharzela (23) te hi Sawrkarin an phu tawk hremna pe ngei turin an phut a ni.

He thil duhawmloh tak thleng hi, Sawrkarin kar khat chhung ngeiin a chhui chiangtu tur Magisterial Enquiry din a, a chhui hna thawk nghal turin an beisei a, an ngaichang a ni.

Tunlai hian thalai rualte, pawl ho anga che in, mi tibuaia kut inthlakrawn mai ching khawpui chhungah an pung ta niin a lang a. Mipui te him tlanna tur leh hetiang ching thin ten an sim ngei theih nan, Sawrkarin ruahmanna tha zawk rang taka a siam ngei an phut bawk a ni.