Aizawl April 11, 2023 : Mizoram University Students' Council chuan vawiin khan MZU Auditorium-ah VIRTHLI TALK an buatsaih a. He huna MNF aiawhin thusawitu MNF Publicity Board Vice Chairman J. Malsawmzuala Vanchhawng chuan Thalaite tih beidawna, hmanrua a hman tum an awm a ti a, mi tha karah mi tha lo an awm ve chauh zawk niin a sawi.

J Sawma chuan, "Mipui leh thalaite tih beidawn a, chu an beidawnna chu hmanruaa hman tum an awm niin a lang a. A pawi hle. Kan ram chhe ta vek ang a sawi te, thalai rual chhe ta vek anga sawi te leh kan politician te eiruk hmang vek anga chhuah te an awm thin. Hei hi kan ram awm dan dik tak a ni lo. Mi tha tam tak karah mi tha lo an awm ve a ni chauh zawk," a ti a. "Hun kal tawhah kan hotuten theih tawp chhuahin ram tan hma an lo la tawh thin a, hma pawh kan sawn ve zel a ni. Slam area awm lohna state kan ni te, kawng hrang hranga eizawng tura remchannain a hual vel ram kan nite hi a vanneihthlak a, remna kan neih hlutzia leh vanneihthlak ziate hi i chhut ang u," a ti bawk.

Social media chungchang sawiin Sawma chuan, "Mizote hi social media hian min khawih nasa hle a. Social Media hmanga kan thu hriatah hian thlitfim loh information a tam a. Tum nei rana thu dik tawk lo thehdarh a tam hle a ni. Hei hian a chhe zawnga nghawng a nei tam hle. Aia upa zahna te, Zonun zemawi te leh khawtlang inrelbawlna thlengin a nghawng; ram inrelbawlnaah pawh nghawng a nei a ni," a ti a. "Mipuite'n Social Media-a kan thil hmuh leh hriatte pawng awih nghal ngawt zel lovin buk ila, a dikna hriatchian tum ila a tha khawp mai," a ti bawk. 

MNF Publicity Board Vice Chairman chuan, MNF leh India inremna anga MZU dinin hma a sawn zel chu lawmawm a tih thu sawiin, "SEDP hmangin kuthnathawktute dinchhuahna turin theih tawpin beih mek zel a ni. Kawng hrang hrangin hmasawnna ruhrel pawimawh pawh a thang zel a ni. Kan kawng te pawh a tha ta viau a, Zirna kawngah pawh sawkarin hma a la nasa. Ni za inhlawhna pawh sawrkar kal taah ni 60 bawr chauhte an inhlawh theih laiin zaa za kan inhlawh thei a ni. thalaite tan skill development-ah sawrkar a kal nasa em em bawk a ni. He sawrkar-in hmasawnna hna a thawh hi sawi mai sen loh khawp a ni hial a ni," a ti a. "Mahni zawn theuha change siamtu nih theuh tumin hma i sawn zel ang u," tiin zirlai te a sawm bawk.

He hunah hian MPCC aiawhin Lalsawta, President a tel, ZPM aiawhin Dr Vanlalthlana a tel bawk a. Zirlaite atangin zawhna leh chhanna hun hman a ni bawk.