Aizawl: Nimin khan Aijal Club ah Indian Council of Agricultural Research (ICAR) - National Research Centre on Mithun, Medziphema, Nagaland leh AH&Vety Department tangkawp buatsaihin sial vulh chungchang zirhona neih a ni a, mi thiamten Champhai, Saiha, Aizawl, Serchhip leh Lawngtlai District sevulhtute ko khawmin sial enkawl dan leh hlawk zawka kalpui a nih theih dan an zirtir. Sial vulh chungchang zirhona hmanpuitu Chief Minister Lal Thanhawla chuan, “India ram boruak thlirin sila chu sakhaw chi tinrengte paw’n sa ei theih a an pawmtlan, sakhuanna pawisawi lo, Secular Meat a nih bakah a hnute thlengin Secular Milk a ni a. Sum thawhchhuahna kawngah a hlawk chho zel dawn niin a lang a; chuvangin sevulh hi ranvulhtuten kan intihhmuh chhoh zel a ngai a ni,” a ti. NLUP chu NEDP hmanga dawm chhoh zel tum a nih angin sevulh duhtu te chu NLUP tanpuina hmanga chhawmdawl an ni ang a ti a. India rama sevulhna hmun, hmarchhak state zingah sevulh tlem ber atanga a vulh tam ber ni tura tanlak chu a pawimawh bakah sum leh paia intodelhna thlen theitu a la ni dawn niin a sawi bawk. Thusawitu dang ICAR Director General Dr. Trilochan Mohapatra chuan, “In kawtkaiah lo kalin theihtawp kan chhuah zel ang a, Sevulhtute tihhmasawnna tur pawhin ICAR chuan Demonstration Centre/Unit pahnih kum in chhungin rang taka rawn siam kan tum dawn a. Sial thankin/puitling tawhte chu man man zawka chantir a nih theih nan sial kaihhnawih sumdawnna thilah pawh ranvulhtute chu kaihruaina pek an ni ang a, hnathawktha te puihna kawngah ICAR-in sum a ren lo vang,” a ti bawk. ICAR thiamna tlawlhchhana kalpui tur, Mizoram Mithun Production & Development Project hi Phase angin kalpui a ni dawn a. Phase-I kalpuina turin Rs.3,82,92,563.00/- chu NEDP atanga hmuh tawh a ni a, phase dang kalpuina tur leh sum hnar tur pawh chinfel thawkhat a ni tawh a ni. MMPDP kalpuina tur hian ram, hectare 20,000 a zau ruahman a ni tawh a; Project chhungah hian ran inthlahpunna leh vulhthauna hmun Ranch panga siam, Intensive Mithun Stud farm, Seed center, Off-farm Infrastructure leh Technical services te khung tel a ni a. MMPDP Sevulh hmalakna hian bawnghnute dehchhuah, sa ei tur chhawpchhuah, savun hralh tur buatsaih leh hnathawk a chhawrtur sechal tam zawk neih te chu a tum a ni. Livestock Census 2012 in a tarlan a nih dan chuan Mizoram-ah sial 3,212 vulh mek a ni a, heng zinga 1858 chu Champhai District khaw 26-ah, 1219 chu Saiha District khaw 10-ah leh a dang tlem azawngte chu Aizawl leh Serchhip Dstrict-ah te vulh a ni.