ZALEN Jan 22, 2026: ITI YMA Branch-in an YMA hmingchhala mi vaubeta pawisa diltute mi pathum an man a. An mi man mi pathumte chu ITI venga an awm zui zel an remti lo.

ITI Veng Branch YMA in thuchhuah an siam danin, January 19, zan dar 10 khan Myanmar atanga raltlan, an veng chhunga awm mi pathumin Lalthlamuana, Vanapa Section a awm chu YMA hmingin pawisa an dil a, a pek loh chuan kutthlak hiala an vau a, pawisa pe lo thei lo dinhmunah an siam tih an sawi.

YMA hming chhala an veng mi vaubeta pawisa diltute chu rang taka an zawn hnuah, January 20 zan khan Myanmar raltlan, ITI venga awm, kum 18 mi Duhlianthanga, Khampat, Myanmar leh kum 21 mi Lalrindika, Kawlchaw West te bakah raltlan mipa kumtlinglo pakhat an man a. Branch YMA hnenan an tihsual tih an inpuang tih an tarlang.

He'ng mi pathum an man te hi January ni 21, 2026 zanah ITI venga raltlan awm te nen YMA hall-ah ko khawm lehin, raltlan dang hriat laiin ITI veng branch YMA Executive Committee-in heng mi pathum te chungchang hi an rel a, kum hnih kaltaa raltlan chungchanga thu dah an lo neih tawh tlawhchhanin, heng mi pathum te hi ITI veng-a awm tawh lo turin an chungthu an relsak a, hemi zan la la hian thuneitute kutah an hlan nghal bawk.