March 6, 2023; Nimin chawhma dar 11 bawr vel a Ainawn veng a Ginkhansiama (33) s/o Tualzachhina vithlum a tlanbo zui ta, Lalawmpuia (25) chu vawiin chawhma dar 11 bawr vel khan Bilkhawthlir thlang, Phaipheng bulah man a ni a, Bilkhawthlir Police Station ah dah mek a ni.

Bilkhawthlir police te hnen atanga ZALEN thudawn danin, Lalawmpuia hian nimin a pawi a khawih hnu-ah motor a hmuh remchan pharin, Bilkhawthlir a pan a, vawiin a Aizawl pan leh tum anga insawiin, Autorickshaw a hmang a, kawng laka Autorickshaw siam a an din laiin, driver in in lama a chhungte bia in, police lam hriattir nghal an ni a, Tuitha veng YMA te pawh hriattir an ni bawk.

Lalawmpuia hian police te hnenah Ainawn veng a awm angin a insawi a, Bilkhawthlir PS ah kawl mek a ni.

Tarlan tawh angin, nimin chawhma dar 11 bawr vel khan Ainawn veng-ah Ginkhansiama chu chemte a vihhlum a ni a, a vittu Lalawmpuia  s/o Khianghlunchhungi hi a tlanbo zui nghal a ni. Ginkhansiama hi North Hlimen khua niin, postmortem tih zawh a nih hnuin nizan khan an khua panpui a ni.

N. Hlimen a pawl hrang hrang aiawhte chuan thuchhuah intawm siamin, in rawk tumin ama in ngeia a vithlum chu pawi an tih thu leh lungchhiatthlak an tih thu an tarlang a, rang taka man tur leh a tihsual an ngei a hremna pe ngei turin sawrkar an phut.