February 22, 2024; Diakkawn atanga mibo, khawtlangin nasa taka an zawn Vanbawihliana (16) c/o Lalngilneii chu dam takin Aizawl-ah hmuh a ni.

Vanbawihliana hi RC Khuma puanthuina dawrah thla chanve vel a thawk hman a, hemi hnu hian hna remchang dang, Aizawl Kanan veng motor silnaah a hmuh avangin a insawn leh ta niin thudawn a ni.

Mibo ber hi dam taka hmuh a nih tak hnuah Diakkawn Branch YMA chuan mibo zawn tihtawp a nih thu hi an sawi a, "Mibo kan zawn Tv. Vanbawihliana c/o Lalngilneii, Diakkawn Kolasib, Ni 31 January 2024 aṭanga bo tawh chu khawtlangin hun eng emaw chen kan zawn hnuin vawiin Ni 18th February 2024 khan dam takin Aizawl veng pakhatah hmuh a ni tawh tih kan inhriattir e," tiin mibo chungchanga mit leh beng lo chhit saka lo ngaihven puitu, mimal, pawl hrang hrang, SHYMA Kolasib leh media lam mite chungah lawmthu an sawi tih an tarlang.

Vanbawihliana hi Cichai Khua, Tahan (Myanmar) piah a awm niin amah hi rualban lo a ni a, Mizo ṭawng thiam luluk lo a ni. Yangoon fahran run-a seilian a ni a, nikum November khan an chhungte belin Kolasib-ah rawn hruaithlak a ni. Diakkawn Silchar Road-ah Lalngilneii te inah awmin thla hlui January 31 zan dar 8:30 vel khan an chenna aṭang hian a chhuak a, hei hi hmuh zui a ni ta lo.

Diakkawn YMA te hi kawngpui dung hrang hrang – Aizawl leh Silchar lam bakah Bairabi leh Phaisen lamah an zawng a, hmun ualau lai leh remchang apiangah a thlalak tar a nih bakah Silchar lam YMA te hriattir an ni a, ramri lama duty police te hriattirin media hrang hrangah a bo thu hi an thehdarh bawk a ni.