November 13, 2023; Election duty a Ngopaa kal, Sabin Nath Constable no-10, Assam 68Bn 9 Company Assam Police chu ni 5. 11.2023 (Pathianni) zing dar 6:45am vel khan an awmna MS-II aṭanga a kal chhuak chu a haw tawh lo a, Ngopa khawtlang in Joint YMA Ngopa kaihhruaina in a zawn hna thawh a ni.

Mizoram Police ten an Ui fing mi bo zawng tur hian Ngopaah an kalpui bawk a, Ngopa Police ten theihtawp chhuahin bo zawn hna an thawk bawk a, mi bo hi khawtlang mipuiin a nawlpuiin ni 7 chhung theihtawp chhuahin zawn a ni a, Police te leh khawtlang hruaitu ten mipui nawlpui zawn hmain ni 1 an zawng bawk.

Mi bo hi Mizo danin ni 7 zawn a nih hnuah hmuh a ni lova, ni. 12.11.2023 (Pathianni) ah a zawn hun hi tihtawp a ni. Bozawn tih tawp na hi Ngopa kawtchhuah zawlah hman a ni a, K. Lalremsiama VCP in a kaihruai a, B. Lalhmangaiha President Joint YMA in report pe in lawmthu sawina hun a hmang a. JC Dailova'n thusawina hun a hmang bawk a, Rev. E. Ramchullova Presbyterian Ngopa Pastor bialtu in ṭawngṭai in a khar.

Ngopa Khawtlangin bo an zawn hi khaw ṭhenawm, YMA NE. Khawdungsei Branch, Tuiphal Group YMA, YMA Kawlbem Branch leh YMA Luangpawn Branch ten an zawnpui a, Pawl hrang hrang, khawṭhenawm leh mimal ṭhahnemngaite hnen aṭangin ṭanpuina pawisa engemawzat an dawng bawk a, bo zawnnaah motor neitu ten phutlet nei miah lovin an motor an thawhchhuahpui a, Joint YMA Ngopa chuan lawmthu an sawi.