Mizoram hi thenawm state te ngaihtuah chuan kan vannei a, hmarchhak state hrang hrangte han chhut ila ram neitu dik takte chu chimral an ni deuh vek tawh a. State thenkhat ah chuan a mihring chimral lo mahse sumdawnna kawngah emaw tal chuan chimral an ni. Hetih laia Mizoram chimral kan la nilo hi a vanneihthlak a, kan fin leh fel vang em em pawh ni lovin Pathian min la hum vangah ngai ila. Chumai bakah kum 20 zet rambuaiin a tha zawnga a nghawngchhuah te pawh niin a lang. Chutih rual chuan Mizorama tlawmngai pawl, zirlai pawl leh sumdawng pawl ten an buaipui em em thin chu hnamdang, Mizo hming hawha sumdawng hi a ni. He thil hi tihrem tumin mi thahnemngai ten an thawk thin a, a chang chuan kut inthlak deuh dawn dawn hial te pawh a thleng tawh thin anih kha. Mahse vawiin thleng hian tihtawp tak tak theih a ni lo a, Mizo leh Mizo karah inhuatna a thlen mai mai ni te pawhin a lang thei hial thin. Tunhnaiah pawh YMA Sub Hqrs. Lunglei chuan Lunglei a hnamdang dan lova sumdawng leh Mizo hming hawha sumdawng nia hriat dawr 10 chu an khartir a. Mizo hming hawha sumdawngte chu Mizo ngeiin a enkawl dawn nia a intiam thei anih chuan intiamkamna an sign hnu ah hawntir nise tiin a tul anga enzui zel nise an ti, a ni. YMA Sub Hqrs. Lunglei hruaitute chuan tun tuma Mizo hming hawha hnamdang sumdawng tireh tura an hmalakna chu a hlawhtling hle in an hria a, thuawih leh zawldawh taka tuartu zawng zawng chungah YMA chuan lawmthu a sawi a ni. Hei bakah hian Mizo hming hawha hnamdang sumdawng te chu tun thla ralhma a in thiarfihlim ngei turin a hriattir nawn leh bawk a ni. YMA Sub Hqrs. Lunglei te hmalakna ang hi tunhma atang tawhin Aizawl leh khawpui dangte lo kalpui ani tawh thin a. Hmalakna kal vung lai chuan hnamdang dawr te pawh an inkhar a, hnamdang leh Mizo hming hawha sumdawnna dawr ah pawh Mizo ten dawr an nghak thin a ni. Mahse hmalakna an chawlh deuh veleh a ngai te bawkin hnamdang ten an nghak leh thin a, teirei peihna a awmloh bakah hmalak reng theih a ni lo bawk nen duhthusam angin thil kalpui a harsa thin a ni. Hmalak chak a harsat chhan hi Mizo leh Mizo kan inhnmachhawn thin vang a ni ber mai. Engpawhnise hnamdang sumdawng chungchangah hian fimkhur tak leh dan behchhan chunga hmalak hi a himin a tlo ber fo a. Thahnemngaih vanga dan kalpela hma kan lak chuan Law court lamah kalin kan hnam himna tura kan ngaih hi kan himlohna thlentu a ni thei a. Hnam dang sumdawng tihtawp kan duhna lamah hian an sumdawnna kawng hawngtu a ni thei a ni tih hriat thar a, fimkhur a pawimawh. Hnam dangte hian sumdawn khapna te, ILP te hi hnawk an tiin tihtawp an duh zek zek a ni tih hre thar fo ang u.