Aizawl April 1, 2023 : MPCC President Lalsawta chuan, Midangte that lohna lai hlir sawi ringawta politics khelh chu a tha a tih loh thu leh  Party dang emaw, midang emaw sawichhe hman a ni loh thu leh ram tana a thil tum hi sawi chu pawimawh bera a hriat thu a sawi.

Vawiina Aizawl South-I Block Conference, BS Farm, Falkland-a hun hmanpuitu MPCC President, Lalsawta chuan, "Midangte that lohna lai hlir sawi ringawta politics khelh hi kei chuan a tha ka ti lo. Party dang emaw, midang emaw ka sawichhe hman ngai lo; ram tana kan thil tum hi sawi ila a pawimawh berin ka hria. Mi kan hnial a, kan nek vak vak hian kan hneh chuang lo. Chuvangin, thil sawt lo, tha bawk si loah chuan hun hmang lo ila a tha ka ti," a ti.

"America ram Independence an sual khan an ngam loh Bristish sawrkar an sual a. Khatih lai khan British chu khawvela ram chak ber, sipai nei tha ber, ram awp zau ber an ni. Mahse, ram hmangaihna tak tak nena an beih avangin a hun laia ram chak ber British kha an hneh thei a ni. He ram hi hmangaihna tak tak nena kan enkawl a, mahni chhiat phah rak khawpa kan beih phawt chuan Mizoram hi kan siamtha thei a ni. Hei hi i ring tlat ang u," a ti.

Lalsawta chuan, "Mizorama mi rethei ber te, hausa ber te, thalaite leh mipui zawng zawng tana sawrkar tha siam hi kan duh a ni. Chutiang tur chuan keini hi koh hran kan ni. Mizoram hi siamthat theih a nih chuan Congress Party hi a siamtha thei tur kan ni. Pawisa puk vak vak lo a kan ram sum dinhmun siamthatte hi kan tih tur a ni. Tunah chuan sawrkar lo awm leh tur te tan pawha harsatna thlen thei khawpin leiba kan ngah tawh. Chhiat lam kan pan zual zel loh nan sawrkar lai hi kan hnawl a ngai a ni. NLUP atangin tanpuina cheng nuai 1 kan pe ang che u kan ti a, kan pe reng bawk a. Chhungkaw thenkhatin hlawhtlin pui lo mah se, chhungkaw tam tak chuan an dinchhuahpui tlat a ni. Cheng nuai 3 pek min tiam laia cheng singhnih sang nga a sem nen hi chuan a inang lo hle. Chuvangin, mipui nawlpui dinhmun chawisan a, mi retheite dawmkan hi Congress Party hna pawimawh ber a ni tih hi i hre nawn leh ang u. Hnam dangten Mizo Kristian nih ve an chakna tur khawpin ram tha leh duhawm, thawk rim leh taimate, remhria te dinchhuahna ramah Mizoram hi siam kan tum tlat tur a ni. Mizoram puma Congress Party mite rilru puthmang tur dik tak a ni," a ti.