Spain-ah vawi tam an lo inhmachhawn tawh a, an khelhna ram a hran hnuah pawh kawng hrang hrangin khaikhin an ni reng a, tu nge Lionel Messi leh Cristiano Ronaldo inkarah hian ‘GOAT’ zawk tih chu mahni tan zawk zawk a ni tawp mai.

Anni pahnih hi ram tharah khelmualah an inhmachhawn leh thei dawn em ni ang tih thawm a ri mek a. Paris St-Germain atanga chhuak tura sawi rik, Messi chuan Ronaldo khelh mekna, Saudi Arabia a pan ve dawn nia sawi a awm.

Argentine forward hi Al-Hilal chuan pawisa tam tham taka sawmin an inrem thuak tawh niin sap ram chanchinbuten an chhuah hlawm a. Portugal captain tana ngeiawm tak turin Al-Nassr-a khel tura a sawm mek, Sergio Busquets pawhin Messi zawk hi a zawm dawn tih thlengin an ziak hlawm.

Messi-a hma hun hi World Cup-a an champion hnu lawk atang khan sawi rik neuh neuh a awm reng a, nipuia PSG-a contract a neih lai a hman zawh tur a ziah belh duh tlat lo.

Argentina captain hi Inter Miami pawhin an beisei a, Barcelona-a kir leh tur ang leh hmun dang pan tura sawi rik reng a ni.

Spain-a El Chiringuito TV chuan Saudi Arabian club Barcelona-a a lo khelhpui thin pahnih, Busquets leh Jordi Alba te nen Riyadh an pan dawn niin a puang ta a. Anb sawi dan chuan kum khatah £ maktaduai 262 zet a hlawh thei dawn a, Ronaldo hlawh chu a khum var var dawn niin an sawi lehzel bawk.

Chanchinbu thenkhat phei chuan a hlawh tur hi £ maktduai 320 zet niin an tar lang a, hei hi a dik a nih chuan Ronaldo hlawh let hnih zet a ni dawn tihna a ni.

Hetiang titi vel karah hian Europe-a an vanglai hun tha zawng zawng inel nana an hman hnuah Messi leh Ronaldo hian Middle East-ah thapui an thawh thar leh dawn nia ngaihna a piang mek.

Spain atanga chhuak tho, Mundo Deportivo chuan Messi-a hian tumah inremna siampui a la nei lo va, season tawpa Barca-a Busquets leh Alba dinhmun tur a chian hunah chauh tihfel a ni dawn niin a tar lang ve thung.

Hriat theuh angin Messi hi kar hmasa lamah khan PSG chuan an hriatpui lohva sumdawnna thila Saudi Arabia a lo zin avangin chawlhkar hnih an hrem a, hei hi Ligue 1-a Lorient an hneh loh tuk maiah a ni.

Thawhtanniah khan club-ah hian letin a training chhunzawm leh tawh thung a, club-in an thu an zuk a nih loh chuan kartawpah pawh a la inkhel lo thung ang.

A chet dan avang hian Messi-a hian ngaihdam dilna pawh a tichhuak tawh a; mahse, mi tam tak, a bikin PSG tantute chuan an club-a khel zui zel turin an duh tawh chuang lo nia ngaih theihin an che mek bawk.

Kum 35 mi, Messi hian kum 2021-a Paris a pan hnuah vawi 71 khelhsak tawhin goal 31 a thun tawh a. Ligue 1 nomawi a lakpui tawh bawk.