ZALEN August 5, 2026 : Mizoram Govt. Adhoc Aided High School Teachers’ Association (MIGAHTA) huaihawtin vawiin khan Mizoram hmun hrang hranga Adhoc High School 90 chuangah Adhoc High School te dinhmun hniam zawka dahna Notification an hal a, khaw tam takah he Notification halna hun hi Managaing Committee, All NGO leh VC ten an hmanpui a, he notification tihchhuah vang hian August 6, 2026 atangin tiamchin awm lovin Mass Casual Leave lak an tum.

MIGAHTA chuan July 29, 2026-a Vanapa Hall kawta sit-in demonstration an neih tumin MZP palaina hnuaiah, Education Minister hriatpuinain sawrkar aiawh Lalmuanpuia Punte, Adviser to CM (Political), ZPM Vice President ni bawkin a sawm angin, a office-ah MZP hriatpuinain inbiakna an nei an ti a.  

Sawrkar laka an lungawi lohna leh an thil phut an sawite chu August 12, 2026-a PAC meeting-a ngaihtuah an tiam ang leh sawrkar nen inbiakna an neih leh hma chuan Adhoc High School-te dinhmun hniama an tlakna tur Category S-1 notification tichhuak lo tura thuneituten an tiam avang te, Sawrkar ngenna zahawm an tih avangin July 30, 2026-ah sawrkar laka lungawi lohna an lantirna sit-in demonstration chu an call off a ni. 

PAC meeting-in an chungchang a rel tur an ngaihchan lai leh an ngen anga Adhoc High School-te dinhmun hniama an tlakna tur Category S-1 notification tichhuak lo tura an ngaih lain; an inbiakna bawhchhia a, Notification tihchhuah hnan an duh lohna entirnan he Notification hi an hal ta a ni, an ti. 

Vawiina MIGAHTA Executive meeting chuan sawrkar chu Provincialised dinhmuna dah let leh turin an phut a. Tuna an dinhmun Adhoc-Grant-in-Aid atanga dinhmun hniam zawk Lump-Sum-Grant-Aid (Category S1) a sawrkarin a dahna Notification August 4, 2026-a a tihchhuah tawh chu cancel a nih hma chuan naktuk August 6, 2026 atangin tiamchin awm lovin Mass Casual Leave lak an tum.  

August 7, 2026 hian Mizoram hmun hrang hranga Adhoc High School te chuan an mahni veng leh khua theuhah School dinhmun tlakhniam tir a nih chungchangah Managing Committee, VC leh All NGO te nen Joint Meeting nei turin ruahmanna an siam bawk. 

MIGAHTA hian school dinhmun hniam zawka dah an ni chu an pawm thei lo va, Provincialised an nih hnuah Adhoc-Grant-In-Aid dinhmuna an dahthla mai pawh duhtawk lo va, a ai hniam Lump-Sum-Grant-In-Aid/S-1 dinhmuna an dah thla leh zel chu na an ti a, a tawp thlengin do zel an tum.  

Provincialised an nih tawh ang ngeia Provincialised dinhmuna min dah let leh tura sawrkar an nawr a, tuna an dinhmun Adhoc-Grant-in-Aid atanga dinhmun hniam zawk Lump-Sum-Grant-Aid (Category S1) a sawrkarin dah a tumna dodalin lungawi lohna hi July 21, 2026 atang khan an lo lantir tawh a ni.