ZALEN June 4, 2026: Mizoram Govt. Adhoc Aided Middle School Teachers’ Association (MIGAMSTA) Executive Meeting chuan tun hnaia Sawrkarin an chungchang thu a ngaihtuah dan an thlir a. Thil fel lo leh fel hlel tam tak a awm nia an hriat avangin Resolution an siam a, hma an lakna kawngah hian Mizoram mipuite tan harsatna a lo awm palh anih pawhin hrethiam turin an ngen.

MIGAMSTA chuan khawtlangin a mamawhna avanga a din, mipuite hnen atanga thawhlawm khawn leh vantlang ram Reserve-te hralh phah khawp-a an lo enkawl thin School, zirtirtute pawhin hlawh mumal la lo leh khawtlang hmangaihna avanga tlawmngaih chhuaha an hmalam hun dahkhama an lo enkawl thin School-te chu kum 2003 khan Lump Sum Aided-ah hlankai niin, 2008 kum khan Adhoc Aided dinhmunah hlankai leh an ni a. Vawiin ni thlengin, sawrkara an thawh anpuite hlawh leh hamthatna ang pawh dawng ve phak lo leh lukhawng mumal pawh nei lovin kum sawm leh pariat zet he Adhoc Aided dinhmunah hian an la awm ta ngar ngar a ni.

2003 kum khan School engemaw zat chu Adhoc Aided dinhmunah hian hlankai (Upgrade) an lo ni tawh a. Heng School-te erawh hi chu 2008 kum khan Provincialise leh nghal vek an ni.

Kum 2008 a Govt. Adhoc Aided Middle School a hlan kai School 64 zing atanga tehna hrang hrang hmanga Sawrkarin a teh hnua 2023 kum-a Provinsialise dinhmuna a hlankai tak te kha School 48 an ni a (Vide Letter No. F. 23015/7/2023 - EDN/4, the 29th September, 2023). 

2024 kum khan heng School 48, Provincialise dinhmuna hlan kai takte hi chhuanlam eng eng emaw siamin sawrkar chuan a sut (Revoke) leh ta mai a. Dan leh hrai fel lote siam that a nih hnuah an dinhmun pangngai (Provimcialise)-a dah chhoh leh mai tura hrilh niin a changtu Minister ngei pawhin school Function mumal takte chu an dinhmun pangngai (Provincialised) a an awm zui leh nghal tur thu leh school signboard leh seal zawng zawnga ‘Government’ tih kan lo dah tawh pawh thlak danglam lo tur leh hman zui leh nghal mai turin a hrilh an ti.

2026 hian Provinsialise Order chu sawrkarin tichhuakin a hmaa sawrkar-in a lo provincialise tawh Adhoc Aided Middle School 48 zinga 4 (pali) chauhte chu provincialise an ni zui a. Heng School 4 zinga School 3-te hi zirlai 80 chunglam an neih avanga hlankai niin hriat a ni. School pakhat erawh chu zirlai tlemte nei ni mah se, ‘Relaxation Clause’ hmanga ngaihhnathiamna nena hlankai nia hriat a ni.

2024 kuma Adhoc Aided dinhmuna dah thlak leh tak Middle School 48 zinga 44 te hi tun dinhmunah an khua/Veng mihring zat atanga teh pawhin Sawrkarin zirlai nei tura a phut zat 100 hi sang em em a. Khaw hnih khaw thumin an intawm High School leh Higher Secondary School-te erawh naupang 60/70 chauh nei tura phut an ni leh lawi si. Thingtlang khaw lian lem lo tak tak, Job Card pawh 100 vel lek lek neihna khua, zirlaite tan Middle School dang han kalna tur remchang awm chuang hauh si lote an ni hlawm a. Khaw tam takah chuan a khuaa Middle School kal rual naupang zawng zawng an khawm vek chung pawh a zirlai 30 pawh pel hleithei lo te pawh an awm a teuh a ni. Hetiang an nih avang leh Sawrkarin a phut zat zirlai 100 hi engtikah mah tlin thei dinhmuna an din loh avangin he tehfung hi sawrkar chak tak hian ngaihtuah tha leh a, inang tlanga ‘Relaxation Clause’ hmanga an dinhmun pangngai Provincialise dinhmuna dah let leh hi an phut a ni. 

The Right of Children to Free and Compulsory Education Act (2010) hnuaia zirlaite chu an chenna in atanga Killometre thum (3) aia hlaa Elementary School kal lo tura beisei an nih mek laia keini Elementary School-te dinhmun hniam zawka min dah thla leh School pawh khar mai thei dinhmuna a din tir chu hriatthiam har an ti. 

Mizoram Government Adhoc Aided Middle School Association Member te hian mahni hmasial avanga dinhmun sang zawk beisei leh nawr an ni ngawt lo, an ti a, an dinhmun ni sa lak sak a, dinhmun hniam leh chhe zawk a dah an ni chu an hrethiam thei lova, an dinhmun tha sa (Provincialised dinhmun) kha pe let leh thuai turin sawrkar hi an beiseiin an phut a ni.

Mizoram Govt. Adhoc Aided Middle School Teachers’ Association Member-te chuan an dinhmun pangngai (Provincialise)-a awm leh tur hian theih tawp chhuah an tum a. Hemi kawngah hian Mizoram mipuite tan harsatna a lo awm palh anih pawhin in hriatthiamna sang tak an ngen nghal bawk a ni.