ZALEN January 20, 2026: Mizoram Government Adhoc Aided School Teachers' Union (MIGASTU) chuan Mizoram sawrkarin sikul eng emaw zat sawrkara a hlan kai tawh hnuah sawrkar tharin dinhmun hniam zawka a dah leh avanga lungawi lohna lantir nan leh thil pawimawh rel ho turin 29.1.2026 ah khian Chanmari YMA Hall-ah special conference an ko.

MIGASTU hian an lungawi lohna puangin, Mizoram sawrkar hnuaia Adhoc rules in a phalsak anga hlawh an lak meka lungawi lo leh hlawh sang phut vang hrim hrima inkokhawm an nih loh thu an sawi.

Sawrkarin 1.10.2023 a school leh zirtirtute sawrkara a hlan kai vek tawh hnua dinhmun hniam zawka sawrkar tharin a dah thla leh chu hriatthiam har an tih thu an sawi a. Sawrkarin provincialized a dah tawhte a hnuhkir leh chhanah thil fel lo a tih thenkhat siam that ngaite zir chiang tura Minister K. Sapdanga chairman na hnuaia Study Team a din pawh kum khat zet a ral hnu pawha an kalpui dan tur tun thlenga engmah an la hre lo chu khawtlang leh zirtirtute leh zirlaite ngaihpawimawh lohna leh tham lohnaa an ngaih thu an sawi bawk.

Mizoram sawrkar hnuaia department hrang hrangah tun ministry chhunga hnathawk dah ngheh an neihnaah Article 14 leh 16 sawi rik leh chelek a nih loh laia, anni open advertisement leh DPC (Government approved) ina a lo lak tawh, kum 17 service bu nen meuha lo thawk tawh an nih hlawm thu sawiin, concerned official atanga approval neia thawk an nih tawh hnua tuna taka rem leh rem loa Article 14 leh 16 an chunga chelek an tum chu hriatthiam harsa an tih thu an tarlang.

Sawrkar hnuaia school upgradation kalpui tawh zawng zawngah Article 14 leh 16 chelek loin tluang takin engkim tihfel a ni thin tih sawiin, sawrkar ding lai hian sawrkar kal tawhte thil tih dan chu a tham loin, thil dik lo ti tluk hialah a ngai nia lang thei chu fel lo an tih thu an tarlang bawk.

MIGASTU member te chu official taka election hrang hrang leh census thlenga mawhphurhna pek an ni chu tha taka an chhunzawm theih nan sawrkara dah let leh vat turin an phut tak zet tih an sawi a. Provincialised a hlan kai an nih khan khawtlang leh mipuiten ruaipui thehin an lawm tawh tih tarlangin, chuti chung chuan khawtlang leh mipuite zah lo leh tham lo takin upgradation chu hnuhkir a ni ta tih an sawi a. Mipui leh zirtirtute hmuhsitna leh tham lohna lian taka an ngaih thu an sawi a ni.

School Education Department ah hian Study Team Chairman K. Sapdanga, DP & AR Minister nge Education Minister zawkin thu nei tih hi hriat hran harsa an tih thu MIGASTU chuan sawiin, Education Minister an hmuhin Study Team ah kal zawk tura a tih thin avangin anni chuan hetiang hi tha natthlak an tih thu leh, zirtirtute hmuhsitna leh tham lohna lian taka an ngaih thu an sawi bawk a ni.