ZALEN October 22, 2023 : Mizoramah kum 2000 atanga kumin 2023 chhungin mihringa sumdawnna (human trafficking) thubuai (no. of case) 35 ziah luh tawh niin, a tuartu mi (no. of victim) 95 an awm a. Thubuai chhui kawngah hian Mizoram police-te an thawk tha hle tih data atangin a lang.

Home department-in achievefment report (2008-2023) tun hnaia an tihchhuah a tar lan a nih danin kum 2000 atanga kumin thlenga mihring a sumdawnna thubuai ziah luh tam ber kum chu 2019 niin thubuai pasarih ziah luhah a tuartu mi 54 an awm a, a bultumtu man (no. of accused arrested) mi 10 an awm.

Kum 2000 atanga kumin thlenga mihringa sumdawnna thubuai ziah luh 35-ah hian a chhuitu police lamin chargesheet thehluh 31 an nei tawh a, thubuai pali dang chu chhui mek a la ni.

Police chhinchhiahna atanga a lan danin Mizoramah mihringa sumdawnna thubuai ziah luh a tlahniam a, kum 2020 atanga kumin 2023 chhungin thubuai ziah luh pahnih chauh awmin, a tuartu mi pakhat a awm a, a bultumtu man erawh mi pali an awm a. Heng thubuai pahnihah hian police-ten chargesheet an thehluh ve ve tawh.

Kum 2000 atanga thubuai ziah luh zawng zawngah hian a bultumtu man mi 64 zet an awm a, data atanga a lan danin he thubuai chhui kawngah hian Mizoram police-te an thawk tha hle tih a lang.

Mihring a sumdawnna thubuai : Mizoram

Kum 2000 atangin thubuai ziahluh a awm tan.

Kum 2019 ah thubuai ziahluh, a tuartu leh a bultumtu man an tam ber.

Tunhnai kum li chhungin thubuai ziahluh a tlahniam.

Thubuai 35 ziahluh tawh ah, chargesheet 31 thehluh a ni tawh.