ZALEN September 19, 2024 : Vawiin khan Congress thalai chuan Zuangtui godown-a buhfai dahna in pathum endikin heng buhfaite hi Grade ‘A’ leh grade ‘C’ tihchian a ni lo a, mipui hnena buhfai tha lo pek hi Congress thalai chuan Chief Minister en turin CMO-ah pek a ni.

MPYCC President Laltawnliana chuan, "Ration Buhfai chhia ei ngaihna kan hre lo, Vawk pul hri avangin vawk chaw atana hman theih a ni lova, lei tha atan te an hmang mai mai a. Hetih lai hian ZPM sawrkar chuan ration buhfai kg 1-ah cheng 30 (100%) in October thla atanga a tihsan tur chu Mizoram mipui an lungngai takzet a, kan sawrkar hrawn mek hian miretheite lû chunga vaivut takngial pawh an it a, pachhiate an rûksak mek a ni," a ti.

"Central sawrkar atanga Buhfai a thlawna kan dawn bak hi a supply tu tur Mizoram sawrkar chuan tender chhuah in a thlang thin. Mizoram hian thla 1-ah Buhfai quintal 59,478 a thlawnin sawrkar laipui atangin kan dawng thin a, hemi baka kan mamawh nia Supply Minister-in a sawi chu Quintal 37,522 a ni."

Congress thalai chuan, "ZPM sawrkarah Buhfai supply hna chhangtu pariat awmin, RL Store, Kulikawn Aizawl chuan chhang hniam berin, Buhfai Quintal 1-ah Rs. 3,400.50 in an supply thei a. Buhfai supply tur thlanna (Limited Tender) ah a chhang hniam ber pek ni lovin an duhsak zawng te hnenah Rs. 3,550/- in supply tir an ni a, a supply tu turte hian midang supply tir lehchhawn nia hriat a ni a, hetah hian thil dik lo tam tak a awmin a hria a. Chuvang chuan mipui hnena thil nihna dik tak puang chhuak turin ZPM sawrkar hi kan phut tlat a ni," an ti bawk.

Hetianga induhsakna hleihluak tak avang hian kum khatah Mizoramin Rs. 67,314,468.00 a chawi thlawn dawn a, mi tlemte hlawkna Mizoram mipuiin an tuar chho zel tur hi Congress thalai chuan vanduai thlak an ti bawk.

ZPM sawrkarin buhfai tha lo mipui hnena a semchhuah hi Congress thalai Office-ah a duh apiang tan en theihin a awm a ni.