Aizawl August ni 2, 2023 : Vawiin khan Golden Hall, Congress Bhawan-ah Wednesday Discussion neih a ni a. He hunah hian MPCC President Lalsawta lehkhabu ziak ‘That Loh Theih Lohna Bawm’ chu David Lalrinchhana chuan Review-na hun a hmang a, MPCC President Lalsawta chuan mihringin a tum chuan tih theih loh a awm lo niin a sawi.

‘That Loh Theih Lohna Bawm’ sawi hawngtu David Lalrinchhana chuan, "Mizo zingah Donald Trump kan ngai lo, Putin-a kan ngai lo, Politician tha tam tak kan nei. Kum 1957-1960 Mizo District Council Secretary, Mizoram hun thim lai bera ngaih 1965-1970 chhung District Council CEM HK Bawichhuaka kha CEM atanga a chawlhin ka In tih tur pawh a nei lo, CEM atanga a ban hnuin Sikulpuikawnah mi inhnuaiah an awm a, mi tam takin an nuih nghe nghe. Mahse Bawihchhuaka chuan, ‘Ka lal lukhum’ a ti thei a ni. Mizoram mipui a nuai tel in siam that a harsa, chuvangin ram roreltu leh kaihruaitu MLA 40 te dik leh fel taka an in siam that hi a awl zawk. Chuvangin he hmun atanga insiam thatna hi tan a ngai," a ti.

"Lalsawta hnuaiah hian inhuamna nasa tak nen lo chuan in kal thei ang em? tia zawhna siamin, "Heng hi in huam phawt chuan Mizoram hian a tha zawnga danglamna a hmu thei ang a, That Loh theih lohna bawma Lalsawta’n, 'I ram lo thleng rawh se,’ a tih hi kan hmu thei ang. Health Care Bill kumpui lingleta kan lak theih loh lai leh thinrim em em a kan awmlaia inthlan dawna cheng sangkhata damlo kan leh si hi thinrim a hun," a ti bawk. 

He huna thusawitu MPCC President Lalsawta chuan, "That Loh Theih Lohna Bawm lehkhabu-ah hian tih theih loh tûr ka ziak lova. Kan tih theih ngei tur ka ziak a ni. Chhuanthar, Baktawnga mite khian That Loh Theih Lohna Bawm an siam thei. Kohhran Thianghlim pawhin inkhuahkhirhna tha tak neiin That Loh Theih Lohna Bawm an siam. Mihringin a tum chuan tih theih loh a awm lova, a that theih a ni. Sawrkar ber a dik loha mipui in dik tum tlat hi thil theih loh a ni," a ti.