Tun hnaia Hamas ten Israel an beihna chuan titi a luah zui zel a, entertainment khawvelah-ah pawh boruak a lian hle. NGO pakhat Creative Community For Peace chuan Hamas te chet dan demna leh Israel thlavang hauhna open letter an siam a, milar 700 vel zetin hming an ziah hnan. 

Open letter-a hming ziak zingah hian Israeli actress Gal Gadot a langsar hle a, an ram tan theih tawp chhuahin a au chhuak mek zel. Kum 38 mi Gal Gadot hian an ramin beih a tawh tirh khan an ram mipuite chunga thil thleng chu pawi a tih thu leh, an ram sawrkarin a chhanlet dan chu a thlawp thu social media kaltlangin a lo au chhuahpui tawh a ni. 

Gal Gadot bakah hian - Amy Schumer, Jerry Seinfeld, Mayim Bialik, Chris Pine, Liev Schreiber, Debra Messing leh Mark Hamill te chu hming ziak langsar zingah an tel a, Hamas te chetna an dem hle. 

Israel chuan Hamas te beihna avang hian pawi sawi lo mi 1200 velin nunna an chan tawh thu leh, hliam tuar pawh sang tel an awm thu a tarlang. Hetih lai hian Palestinian Ministry of Health chuan Israel beih letna an tawh avanga nunna chan zat chu 1500 an chuang tawh tih an sawi a, thi zingah hian naupang 500 vel leh hmeichhia 250 vel an thih thu an tarlang thung.