Twitter a lei tirh atanga thawm nei nghal hat Elon Musk chuan 'kal phung thar' a rawn kalpui a, a tuartu chu milarte an ni! Twitter CEO hian tun hnai khan milar eng emaw zat chu an blue tick a paihsak a, hei hian titi a siam hnem nghal hle. 

Blue tick paih sak zingah hian politician, infiammi leh zaithiam an tam ber a, Bollywood star thlengin an hmaih lo chiang hle. Blue tick hi a hma kha chuan milar leh politician te tan neih a harsa lutuk lo a, a nei tam zawk hi chu mi hriat hlawh tak takte vek an ni - pawisa chawi a awm lo bawk. Mahse tunah chuan Twitter Blue lei phawt a ngai tawh a, subscription tyi lo tan chuan blue tick neih theih a ni tawh lo. Hei hi mi tam tak chuan an sawisel nghal a, sum duh vanga thil tiah Twitter hi an puh a ni. 

Tute nge? 
Blue tick paih sak hi an tam khawp mai a, a lar zual tak tak chin phei chu an paihsak vek ni berin a lang. Oprah Winfrey, Justin Bieber, Kim Kardashian, Bill Gates, JK Rowling, Jay-Z, Beyonce, Harry Styles, Robert Downey Jr. leh Blake Lively te chu blue tick chan zingah hian an tel. Anni bakah hian - Taylor Swift, Rihanna, Cardi B, Ryan Reynolds, Chris Hemsworth, Miley Cyrus, Britney Spears, Snoop Dogg leh Jimmy Fallon te pawh a langsar zinga mi an ni. 

India milar zingah pawh - Shah Rukh Khan, Amitabh Bachchan, Abhishek Bachchan, Alia Bhatt, Deepika Padukone leh Ranveer Singh te chu a langsar zual an ni. Politician zingah chuan - Yogi Adityanath, Arvind Kejriwal, Rahul Gandhi leh Priyanka Gandhi te chu a langsar zual an ni. Infiammi zingah - Sachin Tendulkar, Virat Kohli, Saina Nehwal, Sania Mirza, Rohit Sharma leh Sourav Ganguly te chu blue tick nei tawh lo langsar an ni.  

Hetih lai hian -  Narendra Modi, Amit Shah, Smriti Irani, Rajnath Singh leh midang eng emaw zat chuan grey tick an nei a, golden tick pawh a la awm cheu bawk. Twitter hian sum siam nan an hmang nasa viau dawn a nih hmel a, official business account tan gold tick a awm cheu bawk. 

Blue tick nei an lawm lo!
Blue tick nei zawng zawng hi paih sak vek an ni bik lo a, chung zingah chuan NBA star LeBron James pawh a tel. Hetih rual hian James chuan pawisa chawi tur a pek loh avangin a blue checkmark hi a reh thuai a rin thu Twitter-ah a tarlang! Elon Musk chuan mithen khat chu Twitter Blue hi a lei sak a, chung mite account chu a in blue tick. 

Mahse he tianga a tihsakte hi an lawm vek lem lo a nih hmel a, author Stephen King chuan, "Ka Twitter account hian Twitter Blue ka subscribe tih min hrilh a, mahse pawisa ka pe lo. Phone number pek thu ka hre leh bawk a, mahse ka pe hauh si lo," tiin a tawng chhuak. 

Elon Musk hian Twitter lei nan hian sum a seng hnem hle a, a sum hloh hmuh let leh dan a dap mek. Hemi atan hian Twitter Blue an tithar a, blue tick nei tur chua kum khatah $84 tal chawi a ngai tawh dawn. Twitter hian April 20 atang khan blue tick chungchangah hian hma an la tan a, an thawm pawh a na nghal hle. Hun eng emaw chen chu titi a luah chho dawn niin a lang mek.