Miley Cyrus chuan a vawi khat nan live record album a tichhuak dawn. A album title tur hi 'Attention : Miley Live' tih a ni a, April 1, 2022 ah tihchhuah a ni ang. 

'Nothing Breaks Like a Heart' hitmaker hian hemi chungchang hi Twitter kaltlangin a tarlang a, fans lam pawh an phur nghal hle. American singer chuan, "Live album chungchang hi fans lamin min zawt fo tawh thin a, an tan ka chhawpchhuak thei tur hi ka phur tawh tak zet a ni. Hei hi an tan liau liau a ni e," tiin a sawi. 

'Attention : Miley Live' ah hian hla 20 a awm dawn a, hla a tihchhuah tak loh thenkhat bakah, a hla hit - Party In The U.S.A, The Climb leh Wrecking Ball live record te a tel dawn a ni. Kum 29 mi Miley hian tun hnai khan Lollapalooza, Brazil-ah concert a nei a, hemi tum hian live album a tichhuah tur hi a sawi lang bawk.