Mizo band thangduang Evenflow chuan record duhawm tak an siam a, ni 39 chhung lekin an hla hit 'A.n.A' hmangin million views an nei der mai. YouTube-a million view nei tur hian ni 39 an mamawh a, Mizo band zinga million view kai rang ber nia hriat a ni. 

YouTube-a million view neih tlin hi thil awl ai a ni hauh lo a, band ang phei chuan a harsa leh zual. Evenflow hian July 15 khan an official music video 'A.n.A' hi an tichhuak a, YouTube channel siam chawpin an upload ve thuai! 

He tih hun lai hian subscriber 50 vel chauh an nei a, tunah chuan an hla hit hian vawrhin subscriber pawh 10k chuang an nei tawh a ni. Evenflow chuan, "Beisei si, beisei sang lutuk ngam chiah si lovin kan awm a. Mahse, kan zai leh kan hla min hlutsaktute zarah kan release atanga ni 39 naah 1 million view a lo tling der," tiin lawmthu sawina post an siam. 

An hla hi hi an guitarist Mangheta Jahau phuah niin, video hi Moonshine Studios kutchhuak a ni. An vocalist hi Ruthi Chali niin, Victor Sailo - Guitar, Mangheta Jahau - Guitar/Keys, Kimkima Khawlhring - Bass leh Malsawma Bawitlung - Drums te chu band member te an ni.