ZALEN November 20, 2023: ZPM chuan vawiin khan chhung inkhawm an nei a, he huna thusawitu Working President K. Sapdanga chuan, Politics an luh chhan chu mimal hamthatna tur ni lova ram siam that tuma politics-a lut anni tih hre thar leh theuh turin kalkhawmte a chah.

ZPM Working President chuan, “Inthlan hma zawng kha chuan, kan policy te, kan manifesto-te kha mipui hmaah kan keu thin. Pathian leh mipuite zara kan lo sawrkar ve hlauh a nih chuan, chu kan policy bu tho chu mipuite’n min keu khum ang a, min chhiar khum ve thung tawh dawn a ni. Thu tiam zuk a, ding nghet leh si lote hi mipuite’n an ngaithei lo tih kan theihnghilh tur a ni lo. Pathian leh mipui zara hnehna kan lo chang mial a nih chuan mipui tanpuina dila kan au kual laia kan candidate ten corruption-a inhnamhnawih hauh lo turin an intiam a, an intiam ang ngeia an din tlang theihna turin keini party mipuite hi tanpui theitu hnai berte kan ni. Inngaitlawma tawngtaiin Lalpa au ila, Politics a kan luh chhan hi mimal hamthatna ni lovin ram siam tum kan ni tih i hre thar leh theuh ang u,” a ti

K. Sapdanga chuan sawrkarna siam a nih dan sawiin, “ZPM party hi ZPM sawrkar siam tura piang a ni lo va, mipui sawrkar siam tura piang a ni a, a member-te pawh hi ram siam tura in pe kan ni. Kan campaign lai pawhin thawkrim ber turin kan infuih thin a, kan zawm tha viauin kan hria a, party dang pawh hian kan thawkrim tih min pawmpuiin kan hria a ni. Sawrkarna hi party membership atanga siam theih a ni lova, neutral te an pawimawh em em a, ngawi renga sawrkar inrelbawl dan ngun taka lo zir a, an duhna taka vote thlak tute hian sawrkar an siam mai a, hei hi ZPM te chuan kan pawm thlap tur a ni,” a ti bawk.