Hun engemaw chen Mizoram sawrkarin neih kan tum leh kan awh ve em em Medical College chu kan nei thei ve dawn ta niin a lang a. Tun dinhmunah chuan la chiang chiahlo mahse medical college din kawnga thuneitu sang ber Medical Council of India in rawtna 'letter of permission' pek a remtih tawh miau avangin chiang tluk a ni ta. Engpawhnise Ministry of Health & Family Welfare lamin a phalna tak tak a tihchhuah hunah a chiang mai dawn a, mahse Ministry hi chu remti sa tura ngaih anih avangin Mizoram chuan Medical College kan nei ve ngei dawn tih a chiang ta a, thil lawmawm tak a ni. MIMER hian zinkawng hautak tak mai a zawh a, Medical College dinna atan hian tum 4 ngawt dilna pawh thehluh a niin tunah hian phalna (letter of permission) hi hmu ta lo se a hranpaa dil leh a ngai dawn a. Chumai ni lovin class tan tur pawhin a lo berah nakum nghah a ngai leh dawn tihna a ni. Mahse chutiang ngai lova Mizoram sawrkar leh MP te hnathawh hi a ropui a, chawimawi pawh an phu hle. Hetih lai hian kan hriat tlan angin Mizoram chu remote area a awm kan nih avangin thawktu chungchangah pawh harsatna kan tawk ngei dawn niin a lang a. Professor thiam tak tak te hian Mizorama thawh hi an duh ang em tih chu zawhna awm thei a ni a, thiam taka kan thlem luh a pawimawh awm e. Hei mai bakah hmanrua (infrastructure) chungchangah pawh hmalakna tur tam tak a la awm niin a lang a, nasa lehzuala tanlak a tul dawn a. Zirlaite mamawh tur hrang hrang zingah pawh a bikin mitthi ruang zai tur ah pawh harsatna a awm mai thei a, hei pawh hi official te hian an ngaihtuah lawk vek turah ngai ila. Chuti ni lova Medical college neih kan duh luat vanga kan pal bawrh bawrh anih chuan a tuartu tur chu keimahni hi kan ni leh dawn a ni. Medical College din hi a hautak a, mimal din te pawh mi hausa te an ni a. Mizorama medical college din tur pawh hi a senso a hautak dawn tih a hriat reng mai. Keini ang state pachhe tan kum khata vaibelchhe 50 chuang han sen chu a namailo hle mai a, chuvangin sawrkar pawhin central leh hmundang atanga sum hmuhna tur tun atanga a lo ngaihtuah lawk hi a finthlak ang. Engpawhnise Medical college kan nei tur hi a lawmawm hle a, a chhiat leh a thatah Mizoram mipuite hian mawh kan phur a ni tih hre thar leh ila. Party leh pawl anga hamthatna lak tum emaw inpuhmawh lovin kan zavaia College changtlung kan neih ngei theihnan kan tan a pawimawh hle. Sawrkar hian Medical college lo ding tur hi India rama Medical College tha ber pawl ni thei ngei turin tan han la teh se.