Aizawl: Nimin khan Mizoram Institute of Medical Education & Research (MIMER)-a MBBS course atana fee bithliah tu Committee - Committee for Fee Fixation chu an Chairman High Court Chief Justice (Rtd.) Justice T. Vaiphei hovin Aijal Club ah an thukhawm a. He Committee hi Medical Council of India-in a phut anga din niin May 21 khan Mizoram Sawrkarin a dinna order hi an chhuah a ni. Justice T. Vaiphei chuan Mizoram Sawrkarin rang taka he Committee a din chu lawmawm a tih thu sawiin fee  bithliah chu felfai leh uluk taka thil tih ngai anih thu member te a chah a. Committee chuan MIMER hmasawn zelna tur leh Mizoram dinhmun ngaihtuah chungin MIMER MBBS course fee chu an bithliah fel ta a ni. Zalen thudawn danin nimina Committee for Fee Fixation thutlukna hi sawrkarin a pawmpui leh phawt hnuah mipui hriatah tarchhuah a ni leh ang. MIMER hi August, 2018 atanga class tan tum a ni a, July thlaah admission tih tan a ni ang.