Aizawl: Mizoram Institute of Medical Education & Research (MIMER) chuan Department 3- Anatomy, Physiology leh Biochemistry-ah  bultanin hmalak tan a tum. Medical College din phalna pe theitu Medical Council of India (MCI) chuan MIMER hi Medical College din phalna ‘letter of permission’ (LoP) pe turin Ministry of Health & Family Welfare-ah an rawt (recommend) a. Ministry-in remtihna a pek veleh hmalak tan nghal tum a ni. Zalen thudawn danin MCI-in letter of permission a rawt hi chu Ministry lam hian a tihlawhtling zel thin a, Medical College din phalna pawh May thla chhunga a tihfel hman beisei a ni. A taka MIMER kalpui tur hian sawrkar lam pawh a inpeih tawh a, khawl leh thawktu (staff) pawh an nei tha a, staff indaih lohna tlem la awm pawh hnawhkhah theih zel an beisei. Tun dinhmunah staff ah duhthusam ni lo mah se MCI ngaihhnathiam theih chinah a awm tawh a ni. MIMER enkawlna senso atan hian kum khatah vaibelchhe 40-50 vel ngai tura chhut a ni. Assembly session neih zawh takah khan Health Minister Lal Thanzara chuan MIMER-a sanction post awm zat chu 629 a nih thu leh heta tang hian 52 hnawh khah tawh a nih thu a sawi a. Medical College din turah hian Letter of Permission-in a phut angin hnaruak 409 lak phalna pek a nih tawh thu leh chungte chu Teaching Staff 104, Admistrative Staff 33, Technical Staff 44, Ancillary Staff 54 leh Nursing Staff 174 an nih thu a sawi bawk. Health Minister chuan medical college atan sawrkar laipui chuan vaibelchhe 126.72 sanction-in heng zinga vaibelchhe 24.7 a hmu tawh niin a sawi bawk a ni.