November 10, 2025: BJP Mizoram chuan vawiin khan BJP Mizoram State Office, Mipui Rûn, Upper Republic-ah Karthar Inhlanna hun an nei a, he hun ah hian Nl T. Lalhmachhuani (Mimi) chuan hunserh hmangin Pathian thu sawina hun a nei a, Mizoram tan BJP chu an pawimawh hle tih amah ah a thlen thar tih a sawi.

Nl T. Lalhmachhuani chuan, "Hun pawimawh danga kalna tur ka neih mek laiin BJP State Office Chhung Inkhawma thusawi tura hun tha nei a, Pathianin hun remchang tak min siamsak hi a lawmawm hle a ni," a ti.

Nl Mimi-i chuan sawi chhunzawmin, "Pathian hian thil tum thûk tak a neih avangin vawiinah hian Mizoram-ah pawh BJP te hi in pawimawh hle a ni tih hi keimah ah a lo thleng thar a ni. BJP kaihhruai Sawrkar ah hian Union Minister ah Kristian pa ngei in nei bawk a, BJP Mizoram-te hian Pathian thu in awih a nih phawt chuan in rin aiin in thang chak ang a, Pathianin in hma a hruai ang a, malsawmna nasa tak nangmahni kaltlangin Mizoram hian kan dawng thei dawn a ni."

"Kan Pathian chuan a duh chu a chawi sang a, hnûk hniam thin, Lalpa hman theih tura in awm a ngai a, Central-a BJP hotute hian Mizorama BJP te chu an danglam a ni tih an hmuh a, Kristian kan nihna avanga kan rinawmna leh Mizoram kan hmangaihna an hmuh chuan Pathian-in Central hruaitute aṭangin Mizoram tana hmasawnna kan hmu thuai dawn a ni," a ti bawk.

BJP Mizoram State President Dr. K. Beichhua chuan, "Hunserh hmangtu Nl. Mimi'n thu tha tak min hrilh atanga ka rilrua lo lang chu, Pathian-in min hruai ang a, Kum 2028 MLA Inthlanpui lo awm tur ah chuan Double Engine ni lovin, Triple Engine hmangin hma kan la dawn a, a hmasa berah Pathian, a dawtah Central, a dawt leh ah State-a Sawrkar tih hmangin, Triple Engine tih thupui hmangin hma kan la dawn a ni. Double pawh a chak tawh hle a, Triple Engine ah phei chuan a aia nasa leh zualin a chak dawn a ni," a ti.