ZALEN, Apr. 07, 2025: MST Motors Ather MiMSA Racing Championship vai hawngin kar tawpah intlansiak buatsaih a ni dawn a, Mizoram Motorsports Association chuan inelna sang leh hmasawn zawk huaihawt tumin hma an la.

Zirtawpni zan khan Cultural Centre cum Auditorium, Vaivakawn, Aizawlah Mizoram State Sports Council (MSSC) Vice President Dr Lalhmuchhuaka’n a vai hawng a, Mizoram motorsports-in hmasawn zawnga ke a pen avangin lawmawm a tih thu a sawi a, awmze neia lirthei khalh turin Mizo thalaite a chah nghal.

Lirthei ke hnih nei inelna hlawm hrang pathum - circuit race, drag race leh motocross bakah ke li nei inelna drag race-ah trophy 48 an inchuh dawn a, team 28 telin lawmman Rs. 3,20,000 sem chhuah a ni ang.

February tawp lam khan kum 2025-2027 chhunga Mizoram motorsports hruaitu tur an thlang a, hruaitu tharten championship an huaihawt hmasak ber hian ni thum awhin, Tuirial Airfield-ah Ningani atanga Inrinni thlengin an intlansiak dawn.

President Joseph Lalchhanhima chuan hruaitu kal taten Mizoram motorsports tan hmasawnna tam tak an hnutchhiah a, tun hi hruaitu thlan tharten hma lakna liantham an neih hmasak ber a nih angin theihtawp chhuahin hmasawnna thar hmuh ngei an inbeisei tih a sawi a, Lengpui Sairilzo rama tlankawng siam mek hman hlan an nghakhlel tawh a, kuminah hman theiha peih hman a ni tawh hial a beisei a ni.

Intlansiak hi Mizorama Ather electric vehicle dealer, MST Motors chu championship title sponsor an ni a, Yamaha Thansanga & Sons, LBS Suzuki, CK Hyundai, Monster Energy, Big FM leh MSSC-in an sponsor bawk.