Aizawl April 17, 2023 : Vawiin khan Mizo Hnam Run inkhawmah MNF President leh Chief Minister Zoramthanga chuan party-ah mi thar 181 lawm lutin thu a sawi a. "Pathian leh kan ram tan titu kan ni," tiin zam lo turin party mipuite a chah a. “Min dotute hian an do an hre lo. Thuthlung an do a ni zawk,” a ti.

MNF mipuite zam lo tura fuihin: “Zam suh u! Pu Laldenga te, Pu Zoramthanga te that vang a ni lo. Hruaitute hi chu kan la ral vek dawn. MNF din chhan leh auhla chu 'Pathian leh kan ram tan' tih a ni a. He hnam thuthlung meichher hi a ral lovang,” a ti.

Zoramthanga chuan Mizote chu Pathian remruat dana India-a lut a nih dan a sawi a. Burma zawm emaw, Pakistan, India, Crown colony zawm emaw, independence boruak karah political vacuum (hmun ruak) lo awm a. India ramah kan lo awm ta mai a ni, a ti.

Ram thuthlung sawiin: “China atanga kan pi leh pute lo chhuk kha he ramah hian an tawp chat a. Pathianin ram min pe. A dawtah Lal thuthlung - Chanchintha min pe a. Chutah Hnam thuthlung – kan inhung tlatna tur thisenin nationalism min pe a. He thuthlung hi Lalpan a champion tir dawn.”
“Vawiina min beitute hian an do an hre lo. Hmana thubuai hluite kha an thukphum lum leh a. Zoramthanga hi tichhe vek mah se, hnam thuthlung chu a ral lovang. An doa hi Pathian leh kan ram tan tih thuthlung vuan tlattu a ni. A mihringte hi fel kan ni lo, mah se ram leh hnam tana bei tlattu leh thuthlung vuan tlattu kan nihna hi kan felnaa pawm a ni."

“MNF an do lo, Zoramthanga an do lo. Pathianin Chanchintha hril hnathawk tura he hnam a buatsaihna thuthlung an do a ni zawk. India sawrkar leh sipai general-te pawhin an do hneh loh thuthlung meichher hi do hneh chi a ni lo,” a ti.

Zoramthanga chuan, kum 1966-a ram buai kha pumpelh theih ni mah se, Pathianin thisena baptist a duh. Under ground leh over ground bakah Zoram chhung leh pawna miten an tuar vek. Hei hi hnam thuthlung tihnghehna a ni. Chanchintha hril tura min buatsaihna a ni. Party dangte chu kum enge maw hnuah an ral. MNF chu kum 62 a kal tawh a, a par vul zel a ni, a ti bawk.

Vawiina mi thar 181 lawm luhte hi Aizawl East-I South Block (Zemabawk huam chhung)-a mite an ni a. Lawmluh aiawhin K. Lalhmingliani (Ex-Councillor), Zarzoliana leh Lalringliana-ten thu an sawi bawk a ni.