ZALEN Ocrober 16, 2023 : MNF President Zoramthanga chuan, "MNF hi Nationalism tawtawrawt kengtu kan ni a. MNF hi tunge kan ni tih hi central sawrkar leh kan chhehvel ramten an hre tawh a. Kan unau khawvel hmun hrang hranga awmten min hria a ni. Harsatna kara sawrkar hi MNF hian a dawl zo em em a ni. MNF hi theihtawpin mi hahum khum mah se, min hahum khumtu hi Sabengtung mai a ni tih kan hria," a ti.

Mizo Hnamrun chhung inkhawm-a mithar a lawmluh naah Zorama chuan, "Kiltin atanga beihna chitin reng kan tawk a, mahse hnam thuthlunga din kan nih avangin kan nghing ngailo a. Hnam tana ding ngam, thi ngam kan nih miau avangin kan dinnaah kan nghet a, kan buai ve ngailo. Kumkhat pawh daihlo party, party thlak reng ang mai kan ni ve lo a. Min enchhin rawh u, ti thin te hi Sabengtung Sakei vun sin mai anih avangin Sakeibaknei hramin hram thin mah se, tumahin an hlau tak tak theilo a ni. Nghet taka kum 60 chuang min hruaitu hian kan hma a hruai zel ang, a ti.

Lawmluh atanga thusawitu Lalnunmawia Pautu, MZP President kalchhuak chuan thu sawiiin, hun engemaw chen ram leh hnam thila hna a lo thawh tawhnaah, ram leh hnam tana thawk tak tak, chhehvel unaute leh mipuiin nu leh pa chan changa an ngaih leh an pawm party chu lungsi takin a zawm tih sawiin, "Mizo nationalism hi kan hnam damna leh kan hnam dinchhuahna tur anih avangin, hemi kengtu MNF hi hi lawm takin kan zawm a ni," a ti.