Aizawl Civil Hospital (ACH) accident avanga a ke na enkawl mek chuan a natna chungchang lo thehdarhsaktu chuan a natna avanga a khawngaih vangin a ti ni maia a ngaih thu a sawi a, amah enkawltu doctor te chuan Chhandama chu enkawlna an pek that thu Zalen an hrilh. Chhandama hi thla khat chuang civil hospital-ah enkawl tawh a ni a. Amah hian accident tawkin a ke a hliam a, a hliam hi vun bel tura tih a ni a. A vun bel tuamna an phelhin lung a lo awm a ni. Hemi chungchang hi social media-ah thehdarh a ni a, Zalen chuan Chhandama hi biain amah an khawngaih vanga an lo thehdarha a ngaih thu a sawi a. Enkawlna a dawn that thu leh civil hospital atanga enkawlna a dawn danah harsatna emaw, vuina tur a neih loh thu a sawi. Chhandama hian thla 2 dawn damdawi inah a awm tawh tih a sawi a. Hospital-a awm rei chhan chu a dam har chi a nih a rin thu leh enkawl dam vat theih loh a nih a rin thu a sawi. ACH Orthopaedic doctor te chuan Zalen zawhna chhangin social media-a thehdarh a nih chhan chu civil hospital tihmualpho an tum nge, mak an tih vang nge an hriat loh thu an sawi a, thawktute inthlahdah vang a ni lo niin an sawi bawk. Doctor-te chuan Chhandama chu vun bel a nih thu an sawi a. A hmain tha takin tihfaisak (dressing) a nih thu an sawi a. Vun bel chu tuam tawp tur a nih avangin dressing theih a ni lo a. Dressing hun tawh tura an phelhin lung a lo awm tih a sawi. Lung awm chhan chu an hriat mai loh thu leh tho bawm avangtêin awlsam taka a awm theih thu an sawi a. Tuam that a nih avangin tho vang a nih an rin loh thu leh case vang tak a nih thu an sawi. Damlo dangah pawh hetiang case hi a awm leh zeuh thin niin an sawi bawk.