Mizo kut zinga ngaihhlut hlawh ber Chapchar kut chu kan hma lawkah kan lo thleng leh dawn ta reng mai a, kumin phei chu kum dang aia uar lehzuala hman tum a niin kum danga ni khat hman thin chu kuminah chuan ni hnih (March ni 1&2, 2018)-ah hman a ni dawn a ni. Mizoramah hian kut chi hrang hrang Chapchar Kut, Anthurium festival leh Winter festival te kan lawm thin a. Mahse heng kan kut neihna thina kan sum hmante hi hmun khata luankhawmtira, ropui zawka kut hman dan a awm ringin kumin atang chuan Chapchar Kut hi uar zawka lawm tum a ni a. Sawrkar chu a bultumtu ni dawn tho mahse hun eng emaw chen atang khan Central YMA bultumin kut hi hman a lo ni tawh thin a, kuminah pawh YMA chu a bul tumtu an ni leh dawn a, kut nuam tak kan hman leh ngei beisei ang. Hmarchhak state zingah chuan Nagaland hi an kut pho lar thiam ber an nih hmel a, Hornbill festival chu khawvel hriat thamin an tilar thiam a ni. Hetiang deuh bawk hian keini Mizote pawh hian kut kan neih zinga kan hlut ber Chapchar kut hi khawvel hriatah kan larpui thei a ni tih kan hriat thar leh a tha awm e. Kan thuam leh culture te pholanna hun remchang a nih avang hian khualzinmite pawhin kal an chak theih ngeina turin kut mawhphurtute pawhin tan la thei se a lawmawm hle ang. Kut kan hman tawhnaah Kohhran mit tikham deuh a awm nge ni, Kohhran hruaitute atangin ngaimawhna leh sawiselna a awm deuh thin a. Mahse, Kohhran hruaitute pawhin a hman dan leh a tumte hrechiangin tunah chuan ngaimawh lam ni lovin inrem takin an thawhpui thei ta zel te hi a lawmawm a, bung thar kan kai zel tihna a ni. Engpawh nise, Chapchar Kut hi hlimna leh inremna kut a nih ang ngeiin a tha zawngin hmang zel ila. Chapchar Kut hi hmun hrang hranga Zofate min phuarkhawmtu leh min tichaktu ni zel teh se.