Aizawl: Nimin zing khan Health & Family Welfare Minister Lal Thanzara, Home Minister R.Lalzirliana, Finance Minister Lalsawta leh AH&Vety Minister C.Ngunlian-chunga ten Dawrpui veng chhunga sawrkar hmalakna kal mekte leh hmalak zel dan turte a hmunah a tlawh a. PWD leh UD&PA Department hotute leh Local Council hruaituten an harsatna leh mamawh hrang hrangte a hmuhah an lo hrilhfiah a, a sutkian dan tur leh hmalak dan turte an sawiho nghal a ni. Bazar Bungkawna Flyover Bridge siam mek atanga bul tanin Minister-te hian mipui tan remchang zawk leh chhawr tangkai theih zawk dan turte khawtlang hruaitute nen an sawi hova. Dawrpui Multi Purpose Centre leh Trauma Centre sak hna kal mekte pawh a hmuna enfiahin hma-lakna kal thuah palh awmthei ven nan leh hmalakna intawm thei ang ang te hman tangkai a nih theih nan ruahmanna siam ho zel nise an ti a. Aizawl Civil Hospital leh Milinium Centre bul vela lirthei ke hnih nei chi dahna tur, ruahmanna hrang hrang siamin Minister-te hian an en pui a. Tul anga bawhzui turin UD&PA leh PWD Department-te ngen an ni bawk. Aizawl Police Station leh Civil Hospital huam chhung atanga tuichhe paihna fel tawklo, veng mipui tana harsatna siam theite pawh en ho niin a tul anga hmalak tum a ni a. Vaivakawn-Bungkawng kawng siam mek chu a hmuna an tlawh bakah Dawrpui veng huam chhunga inkalpawhna kawng hrang hrang zauh a nih theih nan ruahmannate siamin a hmunah an enfiah nghal zel a ni. Minister-te leh khawtlang hruaitute hian Dawrpui veng huam chhunga lei min hlauhawm laite pawh en hovin, a ven dan tur leh tuihawk luankawr siamdan tur ruahmanna engemawzat an siam a ni.