ZALEN October 18, 2024 : MPCC President Lal Thanzara chuan Assam Rifles ten Minister an tihbuai chhan chu hekna leh thil dang a awm anih chuan mipui hriatah puangzar turin AR hotute a phut thu a sawi.

Vawiina Congress Bhavan-a ‘Friday Political Session’ a thu a sawinaah Lal Thanzara chuan, “Nimin lama chanchin thar kan hriat angin, kan Power Minister zahawm tak Pu F. Rodingliana chuan an department hnathawh en kuala a zin chu Assam Riffles ten hmun thumah ngawt tidingin an ti buai a. Kan Minister hian National flag a tar a, Pilot a nei bawk a, amah zuitu a nei bawk. Chuti chunga mipuiin kan thlan lal kan Minister, Assam Riffles ten zahlo taka check tuma an lo tibuai hi a lungchhiat thlak kan ti a, kan dem a ni. Kan sawrkar hian he thil thleng hi rang takin a chhan leh a vang chhuichhuak se, hma la se kan duh. Assam Riffles hotute pawh hian hetia kan Minister an tibuai hi hekna leh thil dang a awm anih chuan mipui hriatah puangzar turin kan phut a ni," a ti.

RTI zawhna chungchang sawiin, “Nimin lawkah Chanchinbu ah te kan hmu a, kan Chief Minister in RTI chhanna a en duh vangin a zawttu in a chhanna a hunah a hmu lo tih te a awm a. RTI chhanna hi file a inziak angin Official ten an chhang mai thin a, tun sawrkarah chuan Minister ten RTI chhanna te an duh anga an ti danglam thin hi a pawi a, mipui in thudik an hriat loh phah thei a ni," a ti.

AR Biakin hmun chungchanga sawiin, “Hmani lawka thu rinawm tak chanchinbu ah ZPM President chuan Assam Riffles biakin hmun chhuhsak an tum ngai loh thu a sawi ka lo hmu a, thudik anih chuan ka lawm takzet a ni. Hetih lai hian Assam Riffles Commandant-in AR Kohhran upa te hnena biakin chhuahsan nana an pek te, AR Kohhran ten tawngtaina thupui a an hman te kha kha thudik a ni em kan hre duh a ni," a ti bawk.