ZALEN March 5, 2026: MNF chuan vawiin khan Minister atanga bang tura Dr. Vanlalthlana phutin Vanapa Hall kawtah an pungkhawm a, a hnuai a mi ang hian bang tura an tih chhan an tarlang.

1. A awmna party ZPM MLA Chairman-na hnuaia Assembly Petitions Commitee-in Minister Dr. Vanlalthlana’n Restricted Tender hmanga contractor a thlan dan chu Eirukna/corruption lian tak leh dik lo tak a ni tih a finfiah a, cancel an phut angin sorkarin an cancel sak a. Ama awmna party Sorkar meuh pawhin a dan bawhchhiat nasa lutuk (Eirukna lianpui) tarlana a awm tak avangin a thiltih an cancel sak hi Minister ni tlak lo a ni tih tarlanna a ni a, a MLA puite pawhin thup ngaihna awm miah loa a thilsual tih cancel leh ngei an phut hi cheng Rs.22,48,00,000/- (Rs.22.48 crores) chuang daih a ni a. Hetiang hlemhletna lian tak titu Dr. Vanlalthlana hi Minister atanga bang nghal turin kan phut a ni.

2. Mizoram State University Bill 2025 Assembly a sawiho laiin NEP 2020 angin Lunglei-ah Mizoram State University a dah theih loh thu uar takin a sawi a. A thusawi angin bill pawh passed a ni ta a ni. Mahse kum 1 em pawh a liam hmain Cabinet rorel angin Mizoram State University chu Lunglei-ah suan a nih tur thu a puang leh lawi a. Cabinet rorel anga sawn a nih thu a sawi hnu daihah Cabinet in By Circulation-in an passed leh hnuhnawh tih document atangin finfiah a ni thung!

Hengte hian Minister Dr. Vanlalthlana dawt thuahhnih sawi a lailang chiang hle a, zak miah loa ‘dawt double’ Zoram mipui min hrilh duhtu Dr. Vanlalthlana hi Minister nizui tlakah kan ngai lo a, Minister atanga a ban ngei hi kan phut a ni.

3. Pathian leh Mizoram tana ding MNF chuan dawt leh eirukna hi kan hua a. India Danpui hnuaia thutiam (oath taking) titu-in dawt chiang lutuk a sawi bakah anmahni sawrkar ngei pawhin a cancel sak ngaia eirukna/hlemhletna lian tak a tih avangin Minister ni tlakah kan ngai lo a, Zoram mipui ngaihdan pawh a ni.

4. Minister Dr. Vanlalthlana hian a Dept. chanpualte a hneh loh em avangin Taxation Dept leh I&PR Dept te chu laksak a lo ni tawh a. ICT Dept phei chu a bo ta emaw tih mai turin a awm mek. Tunah pawh a Dept. te a enkawl danah mit a tlung lo em em a. Mizoram tana mi dik leh hmantlak chherchhuahna Department School Education Dept leh Higher Education Dept-te pawh a sawp chhe mek a, siam that leh harsa khawpa a sawp chhiat hma ngeia Minister atanga a ban hi kan phut a, Amah a bang lo a nih pawhin Minister atanga ban ngei turin Chief Minister hi kan phut tel bawk a ni.

5. Dt. 26.02.2026 khan ama Office-ah Official te a ko khawm a, kum 2026–2027 Academic Session tan hun atan 23rd March 2026 an ruatte hi ngaihtuah chian chuan Minister ni tlak a nih lohzia entirna chiang tak a ni. State khat ve riang ruang, thawh phut lu hai nei niawma thla khat em pawh inbuatsaihna emaw chawlhlawk emaw (gap) awm miah loa Sikul kalendar an siam hian Zoram nu leh pa a ti buai em em a ni.

Naupang chawlh tur hisapin chhungkaw tam takin zin program an lo siam a, thlawhna leh rel ticket, hotel booking leh thil dang dang an lo la lawk a, thenkhat chhungkuaa picnic spot leh bus booking ti lawk etc an awm; a thenin chawlh denchhenin vocational studies heng, music, dance, sport etc te atan admission leh fees an lo pe lawk bawk a. Sum lalut tlem zawkten an fate sap sikula an luh ve hram hram theih nan chawlh rei zawng hisapin an fate admission leh thlatin fee, uniform leh lehkhabu leina tur tuak dan an lo ruahman fel ve a. Chung zawng zawng ti buai tura thutlukna a siam mai hian ram hruaitu Minister ni tlak lo a ni tih a tarlang a. Academic session ti danglam tur chuan a nghawng tur mipuite inbuatsaihna hun siam sak ngei tur a nih laia thawh phut lu hai nei ang maia a rorel dan avangte, a bik takin kut hnathawktu mi harsa zawkte tana harsatna lian tak siamtu Dr. Vanlalthlana hi Minister atanga bang ngei turin kan phut a ni.