ZALEN August 26, 2026: Aizawl East-II bialtu MLA, Minister B. Lalchhanzova chuan a bial chhunga December 2025 atanga June 2026 chhunga naupiang 131-te hnenah a thawh nga-na atan lawmpuina sum leh thuziak Armed veng-a HJ Rodinga inah vawiin khan a hlan.

December 2023 atang khan B. Lalchhanzova hian a bial chhung veng pasarih — Chite veng, Armed veng, Armed veng South, Chhinga veng, Tuithiang, Saron veng leh Dawrpui venga naupiangte lawmpuina Rs 1,000 theuh leh thuziak a lo pe tan tawh a. Tuna mi 131-te nen a hmaa a lo pek tawh mi 614-te belhkhawmin naupiang 745 hnenah lawmpuina a pe tling tawh a ni.

B. Lalchhanzova chuan tun dinhmunah Mizoramah nu pakhat zelin nau 1.87 hring ang an nih thu a sawi a. India ram pumpui pian dan 1.99 aiin a hniam zawk tih sawiin, "Hnam a ral loh nan chuan nu pakhat zelin nau 2.1 ang tal an hrin a ngai a ni," tiin pianpun an mamawhzia a tilang chiang hle tih a sawi.

Pianpun mamawh a nihzia tar lan nan leh tan lakna atan he naupiang lawmna hi buatsaih a nih thu sawiin, B Lalchhanzova chuan a bial Aizawl East-II chu sulsutu constituency pawimawh tak a nih thu a sawi bawk.

Pianpun hi hnam anga an vei ngai, sawrkar, kohhran leh tlawmngai pawl ten thukhat vua a an tan tlanna tur a nih thu a sawi a, Mizo hnam a ral loh nan pianpun indopui an puan a ngai tih a sawi a. Mizoram state chu a la thawl em em a, square kilometer khatah mihring 52 chauh an la cheng a, India ram pumpuiah erawh square kilometer zelah mihring 430 cheng ang an ni tih a sawi a. Pung zel turin ram a la zau a, kan tam poh leh Mizo hnam hi a zahawm sauh ang tiin a sawi bawk.